Türkiyənin sabiq prezidenti Abdullah Gül İstanbul Böyükşəhər Bələdiyyə sədri Əkrəm İmamoğluna qarşı aparılan istintaqla bağlı ilk dəfə açıqlama verib.

“Qafqazinfo” “T24.com”a istinadən xəbər verir ki, Gül açıqlamasında vaxtilə bənzər haqsızlıqların Ərdoğana və şəxsinə də edildiyini xatırladıb.

“Vaxtilə Prezident Rəcəb Tayyib Ərdoğana və mənə edilən haqsızlıqları ictimai vicdanın necə qəbul etmədiyini xatırlayaq. Xalqın iradəsi ilə bələdiyyə sədri seçilən Əkrəm İmamoğluna da oxşar səhvlər edilməməlidir. Belə bir çaxnaşma Türkiyədə cəmiyyətin heç bir təbəqəsinə, nə iqtidara, nə də müxalifətə yaxşı nəticə gətirməyib və gətirməyəcək. Qanunun aliliyini və ədaləti itirməməliyik. Əks halda, Türkiyə itirəcək.



Təbii ki, vətəndaşları qıcıqlandıracaq hərəkətlərdən çəkinmək lazımdır. Bu, diqqətlə aparılmalı olsa da, vətəndaşların məlumat almaq azadlığı məhdudlaşdırılmamalıdır. Bugünkü hadisələrin iqtisadiyyatdan tutmuş xarici siyasətə qədər Türkiyənin yaxın və uzaq gələcəyinə mümkün təsirləri yaxşı hesablanmalıdır. Ona görə də bu gərginliyin tez bir zamanda aradan qaldırılmasına ehtiyac var. Uzadıla biləcək və çıxılmaz vəziyyətə gətirə biləcək sınaqlardan qaçmaq vacibdir. Bu proses maksimalist anlayışı ehtiva etməməlidir”.

Xatırladaq ki, martın 19-da İstanbul bələdiyyəsi barəsində genişmiqyaslı korrupsiya əleyhinə aparılan əməliyyat çərçivəsində İstanbulun meri Əkrəm İmamoğlu saxlanılıb və bu, ölkədə aksiyaların başlamasına səbəb olub.