İstanbul Böyükşəhər Bələdiyyəsi (İBB) barəsində korrupsiya və terror istintaqına etiraz olaraq Saraçhanedə keçirilən icazəsiz nümayişlərdə 6 polis yaralanıb.

"Turaztv.az" “Qafqazinfo”-ya istinadən xəbər verir ki, bu barədə Türkiyənin daxili işlər naziri Ali Yerlikaya bildirib.

Qeyd edək ki, Ankara və İstanbulda Əkrəm İmamoğluna dəstək məqsədilə etiraz aksiyaları keçirilir.

Aksiyalarda sakinlərlə yanaşı, Cümhuriyyət Xalq Partiyasının (CHP) nümayəndələri də iştirak edir.

Xatırladaq ki, martın 18-i İstanbul Universiteti İstanbul Böyük Şəhər Bələdiyyəsinin (İBB) sədri Əkrəm İmamoğlunun diplomunu ləğv edib. Martın 19-u isə o, İstanbul bələdiyyəsinə qarşı genişmiqyaslı korrupsiya əleyhinə əməliyyat çərçivəsində saxlanılıb.

İmamoğluya qarşı irəli sürülən ittihamlar arasında cinayətkar təşkilata rəhbərlik etmək və üzvü olmaq, hədə-qorxu yolu ilə pul tələb etmə, rüşvət alma, şəxsi məlumatların qanunsuz əldə edilməsi və tenderin nəticələrinin saxtalaşdırılması var.