Bəzi insanların ad günü təqvimdə adi bir tarix kimi görünür, bəzilırinin isə ömürlərinin keçdiyi yola, yaşadıqları ağrılara, qazandıqları mənəvi ucalığa bir daha nəzər salmaq üçün bir bəhanəyə çevrilir. Cəlil Xeyirbəyin ad günü də mənim üçün belə günlərdəndir. O, əvvəlcə bir atadır. Övlad böyüdən, onun ilk addımına sevinən, ilk uğurundan qürur duyan, yolunu gözləyən ata... Amma taleyin yazdığı ağır bir sınaqdan sonra bu sözün qarşısına daha bir söz gəlib: ŞƏHİD ATASI.



Şəhid atasının sevincində belə bir nisgil olur. O, övladının adını çəkəndə həm qürurlanır, həm də ürəyinin ən ağrılı yerinə toxunur. Çünki şəhid övladın adı artıq yalnız ailənin deyil, Vətənin yaddaşına yazılıb. Bu yaddaş isə heç vaxt silinmir.

C. Xeyirbəyin simasında mən şəhid atasının səssiz, ağır və ləyaqətli duruşunu görürəm. Bəzən belə atalar çox danışmırlar. Çünki sözün çatmadığı yerlər var. Ata ürəyinin ağrısını cümləyə sığdırmaq olmur. Bəzən bir baxış, bir susqunluq, bir kövrək təbəssüm illərlə deyilə bilməyən sözlərin hamısını deyir.
Bu gün Cəlil Xeyirbəyin ad günüdür. Bu gün ona “Ad gününüz mübarək olsun!” deyərkən sözlərimi ehtiyatla seçirəm. Çünki onun keçdiyi yol adi ömür yolu deyil. Onun ömründə həm ata sevinci, həm övlad həsrəti, həm də Vətən qarşısında qürur var. Şəhid atası olmaq ağır bir tale olduğu qədər böyük bir mənəvi məsuliyyətdir. Şəhid övladın adı yaşadıqca ata da yaşayır, onun xatirəsini qoruyur, övladının Vətən üçün verdiyi canın mənasını gələcək nəsillərə çatdırır.
Cəlil müəllimə bu yaş günündə ən böyük arzum ürəyinin bir az rahatlıq tapmasıdır. Allah ona uzun ömür, möhkəm can sağlığı, doğmalarının sevgisini və şəhid övladının müqəddəs xatirəsi ilə qürurlu illər nəsib etsin.
İnsan həyatda müxtəlif adlarla tanınır. Amma bəzi adlar insanın ömrünə elə bir məna verir ki, onu heç bir titul əvəz edə bilmir. Şəhid atası adı da belə adlardandır.

Dəyərli Cəlil Xeyirbəy, ad gününüz mübarək olsun! Ömrünüz uzun, qəlbiniz daim işıqlı olsun. Şəhid övladınızın uca adı sizin üçün hər zaman həm qürur, həm də müqəddəs əmanət olaraq yaşasın. Sizə qarşıda ağrının deyil, daha çox xoş xatirələrin, doğmalarınızın sevgisinin və Vətən qarşısında başıuca yaşamağın bəxş etdiyi gözəl günlər arzulayıram.
Bu gün sizin doğum gününüzdür. Amma biz bu gün sizinlə yanaşı, Vətən üçün canından keçmiş bir övladın atasını da ehtiramla yad edirik.
Ad gününüz mübarək, Cəlil Xeyirbəy!

Hörmətlə: Daşdəmir ƏJDƏROĞLU və Cəmil ZƏBHULLAOĞLU