Sizi 80 illik yubileyiniz və ölkəmizin elm və təhsil həyatındakı çoxillik, səmərəli fəaliyyətinizə verilən yüksək dövlət təltifi - “Şərəf” ordeni ilə təltif olunmağınız münasibətilə ürəkdən təbrik edirəm!
Səksən il - bir insan ömrünün deyil, bütöv bir ziyalı ömrünün salnaməsidir. Bu ömrün hər səhifəsində elmə, təhsilə, milli-mənəvi dəyərlərə və Azərbaycanın gələcəyinə xidmət dayanır.
Siz uzun illər ərzində Azərbaycan elminin və təhsilinin inkişafına mühüm töhfələr vermiş, riyaziyyat elminin inkişafında özünəməxsus məktəb formalaşdırmış, bir ziyalı kimi elmi düşüncənin və təhsilə bağlılığın nümunəsinə çevrilmisiniz. Sizin əməyiniz təkcə yazdığınız əsərlərdə və yetişdirdiyiniz alimlərdə deyil, Azərbaycan təhsilinin inkişaf yolunda da öz izini qoyub.
“Şərəf” ordeni ilə təltif olunmağınızın 80 illik yubileyiniz ərəfəsinə təsadüf etməsi, sözün əsl mənasında, uzun illər davam edən zəhmətinizə dövlət səviyyəsində verilən yüksək qiymətin ifadəsidir.
Əziz Misir müəllim!
Sizə möhkəm cansağlığı, uzun ömür, ailə səadəti, elmi yaradıcılığınızda yeni uğurlar və bundan sonrakı həyatınızda da xalqımıza, elmimizə və təhsilimizə xidmət etmək üçün tükənməz enerji arzulayıram.
80 yaşınız mübarək, “Şərəf” ordeniniz mübarək!
Qoy bundan sonrakı illəriniz də elmə və maarifə həsr etdiyiniz ömrünüzün ən parlaq səhifələri olsun.
Uca Allah Sizə sağlam və mənalı ömür, xalqımıza isə Sizin kimi dəyərli ziyalıları daim nəsib etsin!

Hörmət və ehtiramla,
Abbas Bağırov