Həyatda elə insanlar var ki, onları tanıtmaq üçün uzun-uzadı təqdimata ehtiyac qalmır. Çünki onların adı çəkilən kimi insanın yaddaşında ilk növbədə tutduğu vəzifələr deyil, mənəvi ucalığı, düzlüyü, halallığı və xeyirxahlığı canlanır. Belə insanlar ömürlərini şöhrət qazanmağa yox, insan qazanmağa həsr edirlər. Onların qazancı sərvət deyil, insanların qəlbində qazandıqları etibar və sevgidir. Sərkar Ağabala oğlu Mərdanov da məhz belə şəxsiyyətlərdəndir.
Deyirlər, insanın əsl siması dar gündə, çətin məqamlarda üzə çıxır. Sərkar müəllimi yaxından tanıyanlar yaxşı bilirlər ki, o, həyatın bütün sınaqlarından vicdanını, ləyaqətini və şəxsiyyətini qoruyaraq çıxmış insandır. Onun üçün düzlük sadəcə xarakter cizgisi deyil, ömür yolunun dəyişməz meyarıdır. Haqqı müdafiə etmək, ədalətin yanında dayanmaq, sözü ilə əməlini bir tutmaq onun həyat amalına çevrilib.
Belə xarakter isə təsadüfən formalaşmır. Bunun kökündə halal zəhmət, sağlam ailə tərbiyəsi və mənəvi zənginlik dayanır. El anası kimi hörmət qazanan Camal ananın və zəhmətsevər Ağabala kişinin ocağında böyüyən Sərkar müəllim uşaqlıqdan öyrəndiyi mənəvi dəyərləri bütün ömrü boyu qoruyub saxladı. O, valideynlərinin öyrətdiyi ən böyük həqiqəti heç vaxt unutmadı: insanın ən qiymətli sərvəti vicdanıdır.
Sərkar Mərdanov-73

1953-cü il sentyabrın 15-də Qurbanəfəndi kəndində dünyaya göz açan Sərkar Mərdanov elmə olan həvəsi, zəhmətsevərliyi və məsuliyyəti ilə yaşıdlarından seçilirdi. Azərbaycan Dövlət Universitetinin tətbiqi-riyaziyyat fakültəsində aldığı fundamental təhsil onun dünyagörüşünü daha da zənginləşdirdi. Lakin o, diplomu məqsəd deyil, xalqa xidmət yolunda bir vasitə hesab edirdi.
Əmək fəaliyyətinə 1975-ci ildə Azərbaycan Kənd Texnika Respublika Birliyinin Məlumat-Hesablama Mərkəzində böyük mühəndis kimi başlayan Sərkar müəllim elə ilk gündən yüksək peşəkarlığı, təşəbbüskarlığı və təşkilatçılıq bacarığı ilə seçildi. Qısa müddətdə məsul vəzifələrə irəli çəkildi. Rayonlararası Təchizat Bazalarının Məlumatların İşlənməsi şöbəsinə rəhbərlik etdi, daha sonra Azərbaycan SSR Mərkəzi Statistika İdarəsinin İsmayıllı rayon Məlumat-Hesablama Stansiyasında böyük mühəndis kimi fəaliyyət göstərdi. 1984–1992-ci illərdə İsmayıllı Rayon Statistika İdarəsinin rəisi vəzifəsini uğurla icra etdi.
1992–1993-cü illərdə İsmayıllı Rayon İcra Hakimiyyəti başçısının kənd təsərrüfatı və humanitar məsələlər üzrə müavini kimi çalışaraq rayonun sosial-iqtisadi inkişafına öz töhfəsini verdi. Sonrakı illərdə İsmayıllı Ərazi Hidrometeorologiya İdarəsində məsul vəzifədə fəaliyyətini davam etdirdi.
1999-cu ildə keçirilən ilk bələdiyyə seçkilərində İsmayıllı şəhər sakinlərinin böyük etimadını qazanaraq bələdiyyə üzvü seçildi. Sonrakı seçkilərdə də bu etimadı doğruldaraq sədr müavini, vergilər və iqtisadiyyat şöbəsinin müdiri, yerli büdcə məsələləri üzrə daimi komissiyanın sədri kimi məsul vəzifələrdə çalışdı. Bir neçə dəfə rayon Sovetinin deputatı seçilməsi də xalqın ona olan yüksək etimadının göstəricisi idi.
Harada çalışmasından asılı olmayaraq, Sərkar müəllim üçün vəzifə heç vaxt məqsəd olmayıb. O, hər bir vəzifəni xalqa xidmətin məsuliyyətli bir missiyası hesab edib. Dürüstlüyü, prinsipiallığı, işgüzarlığı və yüksək təşkilatçılıq qabiliyyəti ona həm rəhbərlərinin, həm də kollektivlərin dərin hörmətini qazandırıb. Vəzifələr onun üçün üstünlük yox, daha böyük məsuliyyət idi. Çünki o, yaxşı bilirdi ki, insanı ucaldan vəzifə deyil, insanın özünün vəzifəyə qazandırdığı nüfuzdur.
İnsanlarla münasibətdə onun ən böyük üstünlüyü səmimiyyəti idi. O, heç vaxt süni davranışı qəbul etməyib. Kiminsə könlünü almaq naminə həqiqəti dəyişməyib, şəxsi marağını ümumi mənafeyin önünə keçirməyib. Ona görə də insanlar Sərkar müəllimin yanına arxayın gediblər. Biliblər ki, burada onları yalan vədlər yox, vicdanın hökmü qarşılayacaq.
Onun xarakterində xüsusilə seçilən cəhətlərdən biri də təvazökarlıqdır. Görülən işləri qabartmağı sevmir, etdiyi yaxşılıqları dilə gətirmir. Elə buna görə də onu tanıyanların hörməti gündən-günə artır. Çünki həqiqi böyüklük səs-küydə deyil, sadəlikdə yaşayır.
Sərkar müəllim daim öz üzərində işləyən ziyalılardandır. Riqa, Kiyev və Bakı şəhərlərində keçdiyi ixtisasartırma kursları onun elmə, yeniliyə və peşəkarlığa münasibətinin ifadəsidir. O, istehsalatın idarə olunması, statistikanın təkmilləşdirilməsi, iqtisadiyyatın planlaşdırılması və mühasibat uçotunun təşkili sahələrində biliklərini daim artırmış, öyrənməyi həyatının ayrılmaz hissəsinə çevirmişdir. O, hesab edib ki, insan öyrəndikcə kamilləşir, kamilləşdikcə cəmiyyətə daha çox fayda verir.
Əlbəttə, onun uzun illər ərzində göstərdiyi səmərəli fəaliyyət dövlət tərəfindən də yüksək qiymətləndirilib. Fəxri fərmanlar, diplomlar, "Əməkdə fərqləndiyinə görə" medalı və digər mükafatlar buna sübutdur. Lakin Sərkar müəllim üçün bütün mükafatlardan qiymətlisi insanların qazandığı etimad olub. O, ömrü boyu bu etimadı qorumağı ən böyük mükafat sayıb.
Vətənə bağlılıq da onun xarakterinin ayrılmaz cəhətidir. Dövlətçiliyə sədaqəti, milli-mənəvi dəyərlərə hörməti, Qarabağ uğrunda canından keçən oğullarımıza sonsuz ehtiramı onun daxili aləminin zənginliyindən xəbər verir. O, Vətəni sevməyi sözlə deyil, əməli ilə göstərən insanlardandır. Sərkar bəy müstəqilliyə gedən yolun fəal yolçularından olmuş, xalq hərəkatında yaxından iştirak etmiş, milli azadlıq ideyalarının təbliğində və təşkilati işlərdə öz imkanlarını əsirgəməmişdir. Dövlətçiliyin möhkəmlənməsi naminə gördüyü işlər onun vətəndaşlıq mövqeyinin parlaq ifadəsidir.
Nümunəvi ailə başçısı kimi də Sərkar müəllim böyük hörmət qazanıb. Ömür-gün yoldaşı Zərifə xanımla birlikdə övladlarını elmə, zəhmətə, Vətənə məhəbbət ruhunda böyüdüblər. Valideyn üçün bundan böyük xoşbəxtlik ola bilməz ki, övladları onun adını ləyaqətlə yaşatsın.
Mən Sərkar müəllimi uzun illərdir tanıyıram. Onunla müxtəlif məclislərdə, söhbətlərdə, həyatın müxtəlif məqamlarında bir yerdə olmuşam. Hər görüşdən sonra eyni qənaətə gəlmişəm: bu insan dəyişmir. Çünki onun meyarı zamandan deyil, vicdandan güc alır.
Bugünkü cəmiyyətimizdə belə insanlar mənəvi dayaqlardır. Onlar səs-küylə deyil, davranışları ilə örnək olurlar. Onların varlığı insanlarda düzlüyə, ədalətə və halallığa inam yaradır.
Sərkar Ağabala oğlu Mərdanov məhz belə insanlardandır. O, ömrü boyu məsul vəzifələrdə çalışıb, amma heç vaxt vəzifənin əsiri olmayıb; insanlar arasında yaşayıb, amma heç vaxt insanlıqdan uzaq düşməyib; hörmət qazanıb, amma heç vaxt bu hörmətdən lovğalanmayıb. Əksinə, qazandığı nüfuzu hər zaman sadəliyi, təvazökarlığı və xeyirxahlığı ilə daha da ucaldıb.
Bəzən bir insanın ömür yolu haqqında yüzlərlə səhifə yazmaq mümkündür. Bəzən isə onun bütün həyatını bir cümlə ifadə edir:
Sərkar Mərdanov ləyaqəti ilə yaşayan, vicdanı ilə ucalan, haqqı qoruyan, dövlətinə sədaqətlə xidmət edən və insanlığı ömrünün ən ali zirvəsinə çevirən əsl Azərbaycan ziyalısıdır.
Belə insanlar haqqında yazmaq asandır, çünki onların həyatını bəzəyən sözlər deyil, əməlləridir. Belə insanlar haqqında yazmaq çətindir, çünki heç bir söz onların mənəvi ucalığını tam ifadə etməyə yetmir.
Allah Sərkar müəllimə möhkəm cansağlığı, uzun ömür, ailə səadəti nəsib etsin. Arzu edirik ki, onun halal ömür yolu, xeyirxahlığı, yüksək insani keyfiyyətləri və dövlətə sədaqətlə xidmət nümunəsi bundan sonra da neçə-neçə nəslə örnək olsun.