İnsan beyin hüceyrələri ilə işləyən robot it hazırlandı

Avstraliyanın “Cortical Labs” şirkətinin tədqiqatçıları laboratoriyada çoxaldılan canlı beyin hüceyrələrini silikon çiplərə inteqrasiya edərək robot itin hərəkətlərini idarə etməyə nail olublar.

"Turaztv.az" “Qafqazinfo”-ya istinadən xəbər verir ki, tədqiqatçılar silikon çipə yerləşdirilmiş canlı neyronlarla elektrodlar vasitəsilə ikitərəfli elektrik əlaqəsi yaradıblar.

Neyronların fəaliyyəti nəticədə fiziki robot itin hərəkətlərinə çevrilib.

Əvvəllər “Pong” və “Doom” kimi kompüter oyunlarını oynamaq qabiliyyəti ilə diqqət çəkən bioçip texnologiyası bu dəfə fiziki robot sistemində sınaqdan keçirilib.

Müasir robotlar fiziki hərəkətləri yerinə yetirməkdə uğurlu olsalar da, dəyişən şəraitə uyğunlaşmaq və mürəkkəb vəziyyətlərdə qərar verməkdə çətinlik çəkə bilirlər. Bioloji yanaşmanın əsas üstünlüklərindən biri insan beyninin az enerji sərf etməsi və naməlum vəziyyətlərə uyğunlaşma qabiliyyətidir.

Honda Tədqiqat İnstitutunun Avropa bölməsi ilə əməkdaşlıq çərçivəsində hazırlanan sistem virtual mühitdə sınaqdan keçirilib və minlərlə saatlıq qarşılıqlı əlaqə vasitəsilə öyrədilib.

İnkişafının ilkin mərhələsində olan texnologiya hələ bir sıra çətinliklərlə üzləşir. Tədqiqatçılar canlı hüceyrələrlə etibarlı əlaqə qurmağın, onları öyrətməyin və yaddaş mexanizmlərini anlamağın vacibliyini vurğulayırlar.

Uzunmüddətli məqsəd çətin və təhlükəli şəraitdə tapşırıqları yerinə yetirə bilən, həmçinin zamanla fərdi reaksiyalar öyrənən muxtar robotların yaradılmasına imkan verən neyron əsaslı çipləri inkişaf etdirməkdir.