Təəssüf ki, Prezident İlham Əliyevin Yeni Azərbaycan Partiyasının VIII Qurultayında səsləndirdiyi fikirlərin bir qismini kontekstdən çıxarıb tamam başqa istiqamətə yozmağa çalışanlar oldu. Daha təəssüflisi isə odur ki, bu yanaşma həm Azərbaycanda, həm də Türkiyədə Azərbaycan–Türkiyə münasibətlərini hədəfə almağa çalışan bəzi çevrələrə fürsət verdi.

Halbuki Prezidentin mesajlarının ünvanını anlamaq üçün hadisələrə bir qədər diqqətlə baxmaq kifayətdir.
Bu baxımdan İqbal Ağazadənin məsələyə yanaşmasını xüsusi qeyd etmək istəyirəm. O, son günlər baş verənləri, xüsusilə İran nümayəndələri ilə görüşləri, Möhsün Rezayinin əvvəlki açıqlamalarını və Prezident İlham Əliyevin qurultaydakı fikirlərini bir-biri ilə əlaqələndirərək kifayət qədər aydın mənzərə ortaya qoyub.
İqbal Ağazadəyə təşəkkür edirəm ki, məsələyə emosional deyil, faktların və siyasi kontekstin üzərindən yanaşıb.
Çünki söhbət Türkiyədən getmirdi.

Azərbaycan Prezidentinin çıxışında səsləndirdiyi fikirləri Türkiyə-Azərbaycan münasibətlərinə qarşı çevirmək cəhdi, ən azı, siyasi mesajları oxumaq bacarığının olmamasıdır. Daha açıq desək, bir dövlət başçısının mühüm siyasi çıxışını onun ümumi kontekstindən çıxarıb başqa səmtə yönəltmək ən azı mədəniyyətsizlikdir.
Azərbaycan və Türkiyə münasibətləri hansısa bir siyasi şərhçinin yozumundan asılı deyil. Biz iki dövlətik, amma bir millətik. Bu ifadə sadəcə siyasi şüar deyil. Tarixin, qan bağlarının, ortaq dilin, mədəniyyətin, taleyin və ən çətin günlərdə bir-birinə verilmiş dəstəyin ifadəsidir.
Azərbaycanın ən ağır günlərində Türkiyənin yanımızda dayanmasını Azərbaycan xalqı unutmayıb. Eyni şəkildə Türkiyə xalqı da Azərbaycanın öz dövlətçiliyini, müstəqilliyini və ərazi bütövlüyünü qorumaq yolunda apardığı mübarizəni heç vaxt unutmayacaq.
Ona görə də istər Azərbaycanda, istər Türkiyədə Azərbaycan-Türkiyə münasibətlərinə kölgə salmağa, iki qardaş xalqın arasına şübhə toxumu səpməyə çalışanlara sözüm sadədir:



Hər məsələnin içində qarşıdurma, hər cümlənin arxasında ayrılıq, hər siyasi mesajın içində Türkiyəyə qarşı yönəlmiş niyyət axtarmaqla həqiqəti dəyişmək mümkün deyil.

Azərbaycanın Türkiyə ilə münasibətləri kiminsə şəxsi siyasi maraqlarından böyükdür. Türkiyə-Azərbaycan qardaşlığı sizin arzuladığınız qədər kövrək deyil.
Bu münasibətləri sosial şəbəkə manipulyasiyaları, siyasi təhriflər və cılız təxribatlarla sarsıtmaq mümkün deyil. İstər Azərbaycandakı, istər Türkiyədəki araqarışdıranlara demək istəyirəm ki, boşuna çalışmayın. Sizin bu cılızlığınız böyük xalqları sarsıda bilməz.
Azərbaycan xalqı da, Türkiyə xalqı da kimin dost, kimin isə araya nifaq salmağa çalışan olduğunu çox yaxşı bilir.
Bəzən bir hadisəyə hansı tərəfdən baxmağınız onun necə görünəcəyini müəyyən edir. Pis niyyətlə baxsanız, qardaşlıqda da düşmənçilik axtararsınız. Gözəl baxsanız, illərin sınağından çıxmış dostluğu və qardaşlığı görərsiniz. Elə isə bir daha deyirəm,



Çünki Azərbaycan-Türkiyə qardaşlığı sizin yaratmaq istədiyiniz siyasi gündəmdən qat-qat böyükdür.
Və unutmayın ki, arzunuz ürəyinizdə qalacaq.

Şərafəddin İlkin,
Şair-publisist, Azərbaycan Yazıçılar Birliyinin üzvü,
Prezident təqaüdçüsü, "Beynəlxalq Rəsul Rza mükafatı" laureatı.