Yusif Nəğməkar : SƏSİN DAN YERİ

Xəbərlər

2.10.2026, 00:06

Yusif Nəğməkar : SƏSİN DAN YERİ - FOTO

(Xalq artisti, Ali dərəcəli diktor, illər öncədə iş yoldaşım ELDOST BAYRAM üçün)

Açdım Az.tv-də bir verliş o vaxt,
Güvəndim Eldosta, mətni oxusun.
O da səs mülkündən qurdu elə taxt,
Titrətdi efirin köhnə yuxusun...

Sordu:-qədim yurdlar bizimi səslər?
Dolaşdı xəyalən Türk ellərini...
Ekrandan verlişi seyr edən kəslər
O səsə bağladı könüllərini.

Adı-"Bizim ellər yerindəmi?!"-bu,
Efirdə proqram betəri oldi.
Səsin, diktorluğun Eldost üslubu
Ötəri olmadı, yetəri oldu.

Sözlər qönçələndi nur nəfəsində,
Vurğu mübtədayla xəbəri seçdi...
"XALQİSTEDADLARI" onun səsində
Alqışın "Daimi fond"una keçdi.

Yaddaş səhifələr-varaqcalanan,
Od altda uyuyan közün külümü?!
Neçə kataloqda soraqcalanan
Qızıl saxlancların
Eldost bölümü.

O səsdə sükutla səs bəkarəti
Hərdən nəqllənir, hərdən oxuyur.
Onun payızında bar-bərəkət var,
Yazında təbiət ətir qoxuyur.
***
Gah zildən səslənir, gah da ki, pəsdən,
Piltəsi əriməz çıraqdır o səs.
Dalğası sıldırım qayalar üstdən
Suşaya sancılan bayraqdır o səs.

Bir şəhid anası anidən gülüb,
Sonradan sızlayıb, ürək dağlayır...
Oğlunun son ilac harayı bilib
O səsi dərdinin üstə bağlayır...

O səsin məlhəmi qəlbə bəsdi ki,
Köksü yaralayıb, sinəni deşmir.
O elə hənirdi, elə səsdi ki,
Səhəri açılır, axşamı düşmür...

Fikrin icması da bəzən devrilir
Məqsədin sorağı gəlməyən yerdə.
O səs sözə dönüb nitqə çevrilir
Söz sözünü deyə bilməyən yerdə...

O səs çağırışdı, hikmətdi, şəstdi,
Kimsə nə dinşəməz, nə də ki, doyar.
O səs bir öyrətmən, əxlaqdı, dərsdi,
Zərif ahəngində qəlb səfa duyar.

Buludlar köç edər zirvələr üstdən,
Çöl-çəmən...çən-çisək cəm çəhlim çəkər.
Səsin dan yerində qopan o səsdən
Zülmət, açan sübhün dizinə çökər!..

29.09.2026.