Vətənin sərhədi xəritədə çəkilmiş xəttdən daha böyük məna daşıyır. O xəttin arxasında evlər, ailələr, uşaqlar, bir xalqın tarixi və gələcəyi dayanır. İnsanlar gecənin rahatlığına çəkiləndə sərhəddə bir əsgərin gözü açıq qalır. Bu səssiz növbə Vətənin gündəlik həyatının görünməyən dayaqlarındandır. Fuad Quluzadə də bu gün həmin məsuliyyəti daşıyan gənclərdəndir.
Fuad Rahib oğlu Quluzadə 2000-ci ildə Bakıda dünyaya gəlib. Paytaxtın dinamik mühiti, böyük şəhərin müxtəlifliyi və imkanları onun dünyagörüşünün formalaşdığı mühitlərdən biri olub. Ali təhsilini Qərb Universitetində başa vurması onun həyat yolunda mühüm mərhələ təşkil edir. Lakin Fuadın haqqında danışarkən xüsusi diqqət çəkən məqamlardan biri onun şahmata olan bağlılığıdır.
Şahmat adi bir oyun deyil. O, insanı düşünməyə, səbirli olmağa, bir neçə addım sonranı görməyə, qərarın məsuliyyətini daşımağa öyrədən xüsusi bir məktəbdir. Şahmat taxtasının üzərində cəmi bir neçə fiqurun hərəkəti bəzən bütöv bir həyat dərsini xatırladır: hər addımın nəticəsi var, hər qərarın məsuliyyəti var, bəzən bir anlıq tələskənlik uzunmüddətli nəticə doğura bilər. Fuadın I dərəcəli şahmatçı olması da onun bu sahəyə marağının və müəyyən hazırlıq səviyyəsinə çatdığının göstəricisidir.

Şahmat insana bir həqiqəti öyrədir: qələbə yalnız güclü olmaqdan deyil, düzgün düşünməkdən keçir. Həyat da müəyyən mənada belədir. İnsan qarşısına çıxan hər vəziyyəti yalnız emosiyalarla deyil, ağıl və təmkinlə qiymətləndirməyi bacarmalıdır. Ailə həyatı isə bu baxımdan daha böyük bir məsuliyyətdir. Burada insanın hər sözü, hər addımı, hər qərarı iki nəfərin deyil, bütöv bir ailənin həyatına təsir göstərir.


Bəzən bir evin təməli torpağa deyil, iki insanın ürəyinə qoyulur. Onun divarları daşdan yox, etibardan hörülür, işığını isə sevgi yandırır. Ailə də belə qurulur: iki insanın taleyi bir nöqtədə qovuşur və həyat yeni bir məna qazanır. Murad Polad oğlu Hüseynov üçün də bu günlər həyatının belə əlamətdar mərhələsidir. Memar olan Murad həyat yoldaşı ilə birlikdə ailə ocağının təməlini qoyub. Gənc ailənin bu sevinci həm də yeni bir ömür yolunun başlanğıcıdır.
Murad YES Architects memarlıq şirkətində çalışır. Memarlıq yalnız bina layihələndirmək deyil, gələcəyi təsəvvür etmək, ideyanı gerçəyə çevirmək sənətidir. Memar əvvəlcə xəyal edir, sonra həmin xəyalı cizgilərə, cizgiləri isə real məkana çevirir. Bu baxımdan Muradın peşəsi ilə həyatının yeni mərhələsi arasında maraqlı bir paralellik var: o, bir tərəfdən insanların yaşayacağı məkanları qurur, digər tərəfdən öz həyatında sevgi, etibar və qarşılıqlı hörmət üzərində yeni bir dünya yaradır.
Ailə də əslində özünəməxsus bir memarlıqdır. Onun təməli sevgidən, divarları sədaqətdən, dayaqları qarşılıqlı etimaddan qurulur. İllər keçdikcə bu təməl üzərində xatirələr, arzular, sevinclər və həyatın sınaqları dayanır. Əsas məsələ isə bütün bunları birlikdə yaşamaqdır.
Gənc ailələrin qurulması yalnız iki insanın şəxsi xoşbəxtliyi deyil. Hər yeni ailə cəmiyyətin gələcəyinə qoyulan bir daşdır. Çünki insanın ilk tərbiyə aldığı, mənəvi dəyərləri mənimsədiyi, həyata münasibətinin formalaşdığı ən böyük məktəb ailədir. Möhkəm ailələr çoxaldıqca cəmiyyətin mənəvi dayaqları da möhkəmlənir.

Muradın memarlıq sahəsindəki fəaliyyəti ilə ailə həyatının başlanğıcı arasında bu mənada gözəl bir məna var. O, şəhərlərdə yeni məkanların yaranmasına töhfə verir, öz həyatında isə daha böyük bir məkan ailə qurur. Birincinin layihəsi kağız üzərində hazırlanır, ikincinin layihəsi isə həyatın özündə yazılır.
Onu da deyək ki, Fuadla Muradın həyat yollarında maraqlı bir paralellik görünür. Biri şahmatda düşünərək addım atmağı, digəri memarlıqda quraraq gələcək yaratmağı öyrənir. İndi hər ikisi öz həyatının ən mühüm mərhələlərindən birinə daxil olur. Onların qarşısında yeni arzular, yeni məsuliyyətlər, yeni ümidlər var.
Ailə qurmaq insanın həyatında yalnız şəxsi hadisə deyil. Bizim xalqımızın mənəvi dünyasında ailə həmişə müqəddəs anlayışlardan biri olub. Azərbaycan ailəsi əsrlər boyu özündə ata-ana hörmətini, övlad sevgisini, qohumluq bağlarını, böyüyə ehtiramı, kiçiyə qayğını yaşadıb. Ən çətin günlərdə də insanın sığındığı ilk yer öz ailəsi olub. Sevincini ilk bölüşdüyü, dərdini ilk söylədiyi insanlar da ailə üzvləridir.
Bu gün gənclərin ailə qurması həm də gələcəyə inamın ifadəsidir. Çünki ailə qurmaq sabaha inanmaq deməkdir. İnsan yalnız gələcəyə ümid etdiyi zaman öz həyatını başqa bir insanın həyatı ilə birləşdirir, birlikdə ev qurmaq, övlad böyütmək, arzularını bölüşmək qərarına gəlir.
Fuad və Muradın timsalında biz həyatın müxtəlif istiqamətlərində özlərini inkişaf etdirən, təhsil alan, peşə seçən, bacarıqlarını formalaşdıran və indi də ailə məsuliyyətini üzərinə götürən gəncləri görürük. Onların hər birinin qarşısında öz yolu var. Ancaq ailə onları bir başqa məsuliyyətin qarşısına çıxarır: artıq yalnız öz gələcəyini deyil, birlikdə quracaqları gələcəyi düşünmək.
Gəncliyin ən gözəl tərəfi də elə budur — insanın qarşısında hələ çox yolların, çox imkanların olması. Bu yolların hansı ilə gedəcəyini isə zaman və seçimlər müəyyənləşdirir. Əsas məsələ həmin yolu dürüstlük, zəhmət və ləyaqətlə getməkdir.
Fürsətdən istifadə edib onları təbrik edirəm. Qarşıda onları uzun bir yol gözləyir. Bu yolda uğurlar da olacaq, sınaqlar da. Əsas odur ki, iki insanın bir-birinə olan inamı və sevgisi həmişə möhkəm qalsın.
Hər iki gəncin valideynlərinə gözaydınlığı verib deyirəm: Qoy Fuadın da, Muradın da, onların həyat yoldaşlarının da qurduqları ailə ocağı daim işıqlı olsun, onların ömür yolları sevinc, uğur və gözəl xatirələrlə zənginləşsin. Çünki insan həyatda çox şey tikir - evlər, binalar, şəhərlər... Amma ən qiymətli əsər sevdiyi insanla birlikdə qurduğu xoşbəxt ailədir.

Daşdəmir ƏJDƏROĞLU