İtaliya, Fransa, Almaniya və Böyük Britaniyanın xarici işlər nazirləri olaraq ərəb ölkələrinin Qəzzanın bərpası və yenidən qurulması təşəbbüsünü alqışlayırıq.

Turaztv.az AZƏRTAC-a istinadən xəbər verir ki, bu barədə İtaliya Xarici İşlər və Beynəlxalq Əməkdaşlıq Nazirliyi məlumat yayıb.

Dörd ölkənin xarici işlər nazirlərinin birgə bəyanatında bildirilir ki, plan Qəzzanın yenidən qurulması üçün real yol müəyyən edir və həyata keçiriləcəyi təqdirdə burada yaşayan fələstinlilərin çətin həyat şəraitinin sürətli və davamlı şəkildə yaxşılaşacağını vəd edir. Bərpa və yenidənqurma səyləri həm israillilər, həm də fələstinlilər üçün məqbul olan, uzunmüddətli sülh və təhlükəsizliyi təmin edən möhkəm siyasi və təhlükəsizlik çərçivəsinə əsaslanmalıdır.

“HƏMAS artıq Qəzzanı idarə etməməli və İsrail üçün təhlükə olmamalıdır. Biz açıq şəkildə Fələstin Muxtariyyətinin mərkəzi rolunu və onun islahat gündəliyinin həyata keçirilməsini dəstəkləyirik. Bütün tərəflərin ciddi səylərini təqdir edirik və ərəb dövlətlərinin bu bərpa və yenidənqurma planını birgə hazırlamaqla göndərdikləri mühüm siqnalı yüksək qiymətləndiririk. Təhlükəsizlik və idarəetmə də daxil olmaqla bu məsələlərin birgə həlli üçün ərəb, Fələstin və İsrail təşəbbüsünü dəstəkləmək üçün işləməyə sadiqik. Bütün tərəfləri başlanğıc nöqtəsi kimi planın mahiyyəti üzərində işləməyə çağırırıq”, - deyə bəyanatda qeyd olunur.