İsveçin NATO-ya daxil olmaq ərizəsinin Türkiyə parlamentində müzakirə və təsdiqi Ankaranı narahat edən məsələlərin həlli üçün Stokholmun atdığı konkret addımlardan asılıdır.

Turaztv.az AZƏRTAC-a istinadən xəbər verir ki, bu sözləri “A Haber” telekanalının efirində Türkiyə parlamentinin sədri Numan Kurtulmuş deyib.

“İsveç müsbət hesab edə biləcəyimiz addımlar atır. Amma hazırda bunun kifayət olub-olmadığına qərar vermək bizim Xarici İşlər Nazirliyimiz və hökumətimizdən asılıdır. Əgər hər şey eyni axarda inkişaf etməyə davam edərsə və İsveç bizim narahatlığımızı nəzərə alarsa, Türkiyə hökuməti məsələni parlamentdə nəzərə ala bilər”, - deyə N.Kurtulmuş söyləyib.

Türkiyə parlamentinin sədri qeyd edib ki, iki ölkə parlamentarilərinin danışıqlarının aparıldığı binanın 150 metrliyində terror təşkilatı üzvlərinin aksiya keçirməsi Ankara üçün qəbuledilməzdir: “Biz bilirik ki, İsveçdə vətəndaşlarımızdan pul qoparan terror təşkilatları ilə əlaqəli qruplar var. Bu, bizim üçün çox həssas məsələdir. Xaricdəki bu cür silahlı qrupların hakimiyyət orqanları tərəfindən heç bir halda müdafiə oluna bilməmələrini tələb edirik”.

Qeyd edək ki, NATO-nun Vilnüsdə keçirilən sammitində Türkiyə Prezidenti Rəcəb Tayyib Ərdoğan birmənalı olaraq İsveçin Alyansa daxil olmaq ərizəsini təsdiqləməyə razılıq verib. Lakin Türkiyə parlamentinin yay tətili ilə əlaqədar iş səngiyib. Buna görə də İsveç oktyabrın 1-dək, türk parlamentarilərin işə qayıtdıqları vaxtadək gözləmək məcburiyyətindədir.