Novruzəli Aslanov
Milli Məclisin deputatı

“2020-ci ilin 27 sentyabrında başlayan Vətən müharibəsi Azərbaycan xalqının əsrlər boyu formalaşan azadlıq iradəsinin, milli ləyaqətinin və Vətən sevgisinin ən parlaq təzahürlərindən biri kimi tarixə yazıldı. Bu müharibə 44 gün davam etsə də, onun siyasi, mənəvi və tarixi nəticələri bütöv bir dövrün taleyini dəyişdi. 27 Sentyabr – Anım Günü isə həmin şanlı yolun ən müqəddəs simvollarından biri olaraq xalqımızın yaddaşına əbədi yazıldı. Vətən müharibəsinin ilk günündən Azərbaycan cəmiyyətində misilsiz birlik hökm sürürdü. Müxtəlif yaşda, peşədə və dünyagörüşündə olan insanlar vahid məqsəd ətrafında birləşmişdilər: işğala son qoymaq, torpaqlarımızı azad etmək və tarixi ədaləti bərpa etmək. Döyüş meydanında Azərbaycan əsgəri irəliləyir, arxa cəbhədə isə bütün xalq ona mənəvi dayaq olurdu. Bu, sadəcə ordu ilə xalqın həmrəyliyi deyildi. Bu, milli iradənin bir yumruğa çevrilməsi idi.”

Bu fikirləri aia.az-a açıqlamasında Milli Məclisin deputatı Novruzəli Aslanov səsləndirib.

Məhz həmin birliyin Azərbaycanın Qələbəsini təmin edən əsas mənəvi dayaqlardan biri olduğunu vurğulayan millət vəkili daha sonra bunları deyib: “Vətən müharibəsi göstərdi ki, dövlətin gücü təkcə silahlanma və hərbi texnika ilə ölçülmür. Dövlətin əsl qüdrəti xalqın öz dövlətinə olan inamında, milli məqsədlər uğrunda səfərbər olmaq bacarığında və çətin məqamda vahid mövqedən çıxış etməsində özünü göstərir. 44 gün ərzində Azərbaycan xalqı dünyaya məhz belə bir birlik nümunəsi nümayiş etdirdi. Döyüş meydanında isə qəhrəman əsgər və zabitlərimiz öz adlarını müasir tariximizin ən şərəfli səhifələrinə yazdılar. Onlar hər bir əməliyyatda peşəkarlıq, cəsarət və yüksək mənəvi ruh nümayiş etdirdilər. Azad edilən hər bir kənd, qəsəbə, şəhər və strateji yüksəklik Azərbaycan Ordusunun gücünü və hərbçilərimizin fədakarlığını təsdiqləyirdi. Cəbrayıl, Füzuli, Zəngilan, Qubadlı, Hadrut və digər yaşayış məntəqələrinin azad olunması, nəhayət, Şuşanın azadlığı Vətən müharibəsinin gedişində mühüm dönüş nöqtələrinə çevrildi. Şuşanın azad edilməsi xüsusi tarixi və mənəvi əhəmiyyət daşıyırdı. Azərbaycanın mədəniyyət paytaxtının azad olunması yalnız hərbi qələbə deyildi. Bu hadisə xalqın mənəvi yaddaşına, tarixi köklərinə və milli kimliyinə qayıdışın rəmzinə çevrildi. Şuşa uğrunda qazanılan Qələbə Azərbaycanın Vətən müharibəsindəki tarixi üstünlüyünü daha da möhkəmləndirdi və Ermənistanı kapitulyasiya xarakterli sənədə imza atmağa məcbur etdi. 44 günlük müharibə zamanı əldə olunan nəticələr sonrakı siyasi proseslərdə də Azərbaycanın mövqelərini gücləndirdi. Döyüş meydanında qazanılan Qələbə diplomatik müstəvidə davam etdirildi və Ağdam, Kəlbəcər, Laçın rayonları Azərbaycana qaytarıldı. Beləliklə, Vətən müharibəsində əldə olunan tarixi nəticələr yalnız hərbi əməliyyatların yekunu ilə məhdudlaşmadı, Azərbaycanın ərazi bütövlüyünün bərpası istiqamətində yeni siyasi reallıq yaratdı. Bu tarixi Zəfərin arxasında isə şəhidlərimizin müqəddəs xatirəsi dayanır. Onlar Vətənin azadlığı naminə ən qiymətli varlıqlarını – həyatlarını fəda etdilər. Azərbaycan xalqı onların qəhrəmanlığını heç vaxt unutmayacaq. Prezident İlham Əliyevin vurğuladığı kimi, şəhidlərimizin qanı yerdə qalmadı, onların qisası döyüş meydanında alındı. Bu sözlər yalnız Qələbənin siyasi nəticəsini deyil, həm də xalqın uzun illər daşıdığı ədalət arzusunun gerçəkləşməsini ifadə edir. 27 Sentyabrda Azərbaycan xalqı şəhidlərinin ruhu qarşısında baş əyərək onları böyük ehtiramla yad edir. Ancaq Anım Günü yalnız hüzn günü deyil. Bu tarix həm də milli qürurun, sarsılmaz iradənin və xalqın öz gücünə inamının günüdür. Şəhidlərimizin bizə bəxş etdiyi Zəfər Azərbaycan tarixinin əbədi sərvətidir” – deyə, Novruzəli Aslanov fikirlərini tamamlayıb.