​Tədbirin moderatoru — Humanitar və təbiət elmləri fakültəsinin dekan müavini, tarix üzrə fəlsəfə doktoru Mürvət Əliyev giriş nitqi söyləyərək məclisi açıq elan edib. Ulu Öndər Heydər Əliyevin və torpaqlarımızın bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edildikdən sonra Dövlət Himni səsləndirilib.
​İlk olaraq kürsüyə dəvət olunan ADPU-nun Quba filialının direktoru, professor Yusif Alıyev öz geniş və proqram xarakterli məruzəsində bildirib ki, əsası Ulu Öndər Heydər Əliyev tərəfindən qoyulan və Müzəffər Ali Baş Komandan İlham Əliyevin rəhbərliyi ilə öz intibah dövrünü yaşayan Azərbaycan Ordusu bu gün texnoloji təchizatı, yüksək döyüş taktikası və mənəvi-psixoloji hazırlığı ilə dünyanın ən güclü orduları sırasındadır. Professor vurğulayıb ki, 44 günlük Vətən müharibəsində və antiterror əməliyyatlarında qazanılan tarixi zəfərlər təkcə hərbi gücün deyil, həm də düzgün qurulmuş hərbi strategiyanın və elmi-nəzəri əsaslara söykənən idarəetmə modelinin bariz nümunəsidir.
​Yusif Alıyev çıxışında təhsil işçilərinin və gənc nəslin üzərinə düşən məsuliyyətdən danışaraq qeyd edib:
​"Bir elm və təhsil müəssisəsi olaraq bizim ən böyük borcumuz hərbi quruculuq prosesinə sadəcə hərbi nöqteyi-nəzərdən deyil, məhz elmi-nəzəri baxış bucağından yanaşmaq, bu şanlı tarixi dərindən araşdırmaq və gənclərimizin şüuruna aşılamaqdır. Güclü ordu təkcə müasir silahlardan ibarət deyil; güclü ordu həm də savadlı, strateji düşünməyi bacaran, milli ideologiyaya sadiq zabit və əsgər heyəti deməkdir. Biz universitet olaraq elə bir gənclik yetişdirməliyik ki, onlar həm sülh dövründə elmdə, təhsildə ölkəmizi irəli aparsınlar, həm də ehtiyac yarandığı anda vətənin müdafiəsinə hazır olan intellektual əsgərlərə çevrilsinlər."
​Məruzəsinin sonunda professor bütün şəxsi heyəti və hərbçiləri bayram münasibətilə təbrik edərək, rəhbərlik etdiyi filial kollektivinin gənclərin hərbi-vətənpərvərlik ruhunda tərbiyəsi istiqamətində dövlət qurumları ilə birgə layihələri bundan sonra da qətiyyətlə davam etdirəcəyini bildirib.
​Daha sonra çıxış edən SHXÇDX-nin Quba rayon şöbəsinin rəisi, polkovnik Yasin Aşurov vurğulayıb ki, gənclərimizin hərbi-vətənpərvərlik ruhunda tərbiyə olunması və orduya çağırışaqədərki hazırlıq səviyyəsi onların ən ümdə vəzifəsidir; müzəffər ordumuzun qazandığı tarixi qələbələr bu gün hər bir çağırışçı üçün ən böyük motivasiya mənbəyidir.
​Tədbir Quba Rayon Heydər Əliyev Mərkəzinin direktoru Sevinc Səlimovanın dəyərli fikirləri ilə davam edib. O, Ulu Öndər Heydər Əliyevin müasir ordu quruculuğundakı rolunun danılmaz olduğunu, bu gün mərkəz olaraq onun zəngin irsini və ordumuza verdiyi dəyəri gənc nəslə çatdırmaqdan qürur duyduqlarını ifadə edib. Quba-Xaçmaz Regional Gənclər və İdman İdarəsinin rəisi Qumru Məmmədova isə öz növbəsində müasir Azərbaycan gəncliyinin həm idmanda, həm elmdə, həm də döyüş meydanında öz sözünü dediyini xatırladaraq, gənclərin fiziki və mənəvi baxımdan sağlam, vətənə sadiq yetişməsi üçün regional idarə olaraq var gücləri ilə çalışdıqlarını qeyd edib.
​Rəsmi hissənin sonunda Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin Quba rayon şöbəsinin rəisi, polkovnik Yasin Aşurov 26 İyun — Azərbaycan Silahlı Qüvvələri Günü münasibətilə, Azərbaycan Dövlət Pedaqoji Universitetinin Quba filialı ilə effektiv tərəfdaşlıq əlaqələrinin qurulması, həmçinin gənclərin hərbi-vətənpərvərlik tərbiyəsi sahəsindəki səmərəli və nümunəvi fəaliyyətinə görə Fəxri Diplom və Təşəkkürnamə ilə təltif olunub.
​Ardınca tədbirə xüsusi rəng qatan Quba rayonu Z. Kərimov adına Nügədi 1 saylı tam orta məktəbin II a və II b sinif şagirdləri səhnəyə çıxaraq öz musiqili təqdimatlarını nümayiş etdiriblər. Balaca fidanların vətənpərvərlik ruhundakı çıxışları hər kəs tərəfindən böyük rəğbətlə qarşılanıb. Proqramın sonunda tarixi günü əbədiləşdirmək məqsədilə bütün iştirakçılarla birlikdə xatirə şəkli çəkdirilib.

NƏHAYƏT ŞİRİNOVA
ADPU-nun Quba Filialı Heydər Əliyev Lektoriyasının müdiri.
Azərbaycan Jurnalistlər Birliyinin üzvü.