Elçin NƏSİB,
jurnalist


Aynur vətənpərvər qızdır. Atası Həbib Zeynalov deyir ki, hələ uşaq yaşlarından Aynurun qəlbi Vətənə, torpağa bağlıdır. Ürəyi Azərbaycanın dərdi, sevinci və gələcəyi ilə döyünür. Bir gün Aynur televizora baxırdı. Orada əsgərlərimizi göstərirdilər. Birdən Aynur dedi: “Ata, mənə verilən pulu əsgər əmilərə göndərək”. O vaxt qızımın 6 yaşı vardı. Onun bu sözlərinə çox sevindim və qızımı dəstəklədim. Ertəsi gün Sabirabad “ASAN xidmət” mərkəzinə gedib Aynurun anasını itirdiyinə görə aldığı 233 manat müavinəti Azərbaycan Ordusunun Silahlı Qüvvələrinə göndərdik.
Atasının sözlərinə görə, hazırda Aynur anasını itirdiyinə görə 431 manat müavinət alır və həmin vəsaitdən öz istəyi ilə hər ay "YAŞAT" Fonduna köçürülür. Bundan başqa, Türkiyədə zəlzələ olarkən Aynur ora da yardım əli uzadıb. Ümumiyyətlə, Aynur 6 yaşından Azərbaycan Ordusunun Silahlı Qüvvələrinə, "YAŞAT" Fonduna və 2021-ci ildən isə “Türk Kızılay”a mütəmadi olaraq anasızlıq pensiyasını üç yerə bölərək göndərir.
Bütün bunlara görə Aynur Türkiyənin Qızıl Ay Cəmiyyətindən (“Türk Kızılay”), "YAŞAT" Fondundan və digər təşkilatlardan Fəxri Fərmanlar, təşəkkürnamələr almışdır.
Xeyirxahlıq nə yaşa, nə də fiziki imkanlara baxır. Unutmayaq ki, böyüklük boyda deyil, ürəkdə və əməldədir. Xeyirxah əməllər heç vaxt unudulmaz, yaxşılıq edən yaxşılıq tapar. Hud surəsinin 115-ci ayəsində deyildiyi kimi: "Allah yaxşı iş görənlərin mükafatını puç etməz".
Aynur Zeynallı özünün xeyirxah əməlləri ilə insanların qəlbində taxt qurub. O, şəhid ailələrinə də dəstək olur, yardımlar göstərir. Balaca xeyriyyəçi kimi tanınan Aynurla indi Sabirabad rayonunda hər kəs fəxr edir.
1 İyun - Uşaqların Beynəlxalq Müdafiəsi Günüdür. Bu münasibətlə yumruğu boyda ürəyinə Azərbaycan qədər sevgi sığdıran Aynur qızımızı ürəkdən təbrik edirik! Qoy qəlbində yaşayan Vətən sevgisi, qüruru və böyük vətənpərvərlik hissi heç vaxt onu tərk etməsin.