Avropa Komissiyası (AK) cümə günü Ukraynanı dəstəkləmək üçün 90 milyard avroluq kredit proqramı çərçivəsində Kiyevə silah alınması üçün 3,3 milyard avro köçürəcəyini açıqlayıb.

"Unikal" xəbər verir ki, əvvəlki gün AK prezidenti Ursula fon der Lyayen Ukrayna prezidenti Volodimir Zelenski ilə telefon danışığından sonra bu planı açıqlayıb. O bu vəsaitin "dron və raketlərin alınması üçün" istifadə olunacağını qeyd edib.

"Bu, proqramın müdafiə komponenti çərçivəsində Ukraynaya ayrılan dördüncü tranşdır. Bu ödənişlə Komissiya tərəfindən bu il müdafiə və digər dəstək üçün Ukraynaya köçürülən vəsaitin ümumi məbləği təxminən 15 milyard avro təşkil edəcək. Ukraynanı dəstəkləmək üçün kredit proqramı 2026-2027-ci illər ərzində büdcə yardımı üçün 30 milyard avro və müdafiə ehtiyacları üçün 60 milyard avro təmin edir", - deyə Avropa Komissiyasının kommünikesində bildirilir.