SEVİNC YUNUSLU : Belə gözəl hisləri bu cür ifadə edən dəyərli imza da var olsun!

Xəbərlər

2.04.2026, 13:32

SEVİNC YUNUSLU : Belə gözəl hisləri bu cür ifadə edən dəyərli imza da var olsun! - FOTO

İnsanın öz içində dinlədiyi hər musiqi, oxuduğu hər şeirlə bir bağı olur, bəlkə özünün də bilmədiyi gizli bir bağı.. Bu şeir mənim üçün çox dəyərlidir. Çünki xoşbəxtliyin şeiridir. İnsanın nadir hiss etdiyi o duyğunun..Xoşbəxtliyin!..Bu duyğunu günlərdir xatırlayıram və ölənə qədər də unutmaq istəmirəm..Belə gözəl hisləri bu cür ifadə edən dəyərli imza da var olsun!

Rəbiqə Nazimqızı

Gözlərimdə günəşi söndürən adamsan sən,
Ovucların nə gözəl sevdirir qaranlığı.
Söz-söz keçib könlümə, şeir yaradansan sən,
Necə yaxşı yaraşır taxtıma sultanlığın.

Sən mənim üç gündən bir küsüb-barışdığımsan,
Sən mənim susduğumsan, mənim danışdığımsan,
Sən mənim zərrə-zərrə itib qarışdığımsan,
Nə varsa yaşadığım, hamısı sənə xatir.

Sən mənim gərgədanım, ağ divimsən,filimsən,
Əzrayıl eşitməsin, sən ən dadlı ölümsən,
Sən mənim açarımsan, sən mənim qıfılımsan,
Bütün nağıllarımdan almalar sənə çatır.

Qollarında dünyanı unutduğum adamsan,
Sən yeganə doğrusan, sən ən təmiz yalansan.
Bu dünyada ən gözəl anları yaşadansan,
Gəl e, səni deyirəm, tez ol, özünü yetir.

Sən nanəli şəkərsən, sən naxışlı qapısan,
Sən ümid topasısan, arzuların sapısan,
Nolardı vaxtındaca düz yerində tapılsan,
Bax yenə gecikirsən, yenə də səbrim bitir...