Türkiyənin Niğde vilayətində baş verən sel və daşqınlar nəticəsində bir nəfər həlak olub.

AZƏRTAC xəbər verir ki, Türkiyə Daxili İşlər Nazirliyinin Fövqəladə Hallar İdarəsinin (AFAD) məlumatına görə, güclü leysan yağışı nəticəsində Niğde vilayətinin Gümüşlər rayonunda təbii fəlakət baş verib.

Hadisə bölgəsində avtomobil yollarına və kommunikasiya xətlərinə ciddi ziyan dəyib. Nəqliyyat vasitələri yollarda qalıb.

Niğde valisi Nedim Akmeşe bildirib ki, sel suları Gümüşlər rayonunun altı sakinini aparıb, onlardan biri həlak olub, digərləri xəstəxanaya çatdırılıb.

Vali vətəndaşları çay yataqlarından və daşqın riski olan ərazilərdən uzaq durmağa çağırıb.