XATİRƏ İSMAYILOVA


Yəqin ki, cəmiyyətdə belə insanlar qarşınıza çıxıb,
dinləyir, amma danışmır…
ğörür,amma müdaxilə etmir..
haqq verir , amma haqqın yanında dayanmır…
Bu iki halda baş verə bilər , ya ümumiyyətlə onun özünün mövqeyinin təsir gücünün müxtəlif səbəblərdən əhəmiyyətsiz olduğunu anlaması , ya da özünü qoruma instinkti.
Belə insanlar ilk baxışda sakit , təmkinli , ” hamını idarə etməyi bacaran “ biri kimi görünürlər.Amma zaman keçdikcə anlayırsan ki ,həmin adamın bacarığı problemi həll etmək yox , onu özündən uzaq saxlamağıdır.
Çünki mövqe bildirmək cəsarət istəyir.
Haqsızlığın qarşısında susmamaq risk istəyir.

Həyatında hər hansı bir problem ilə qarşılaşan insanlar dərdini danışanda əslində kömək istəmirlər, onlar ədalət axtarırlar. Qarşısındakı insanın barmağını vicdan tərəzisinin həqiqət gözünə qoyacağına ümid bəsləyir.
Nəticə etibarı ilə heç bir reaksiya görmədikdə insanlar isə məyusluq hissi ilə bərabər təəccüb hissi də yaşayırlar.
Ən ağır hiss isə qarşındakı insanın gücü ,və ya sözünü deyə biləcək məqamı olmasına baxmayaraq o gücü haqq üçün istifadə etmədiyini görməkdir.
İnsanın xarakteri ən çox rahatlığını riskə atmalı olduğu yerdə görünür.
Ədalət yalnız təhlükəsiz olanda danışılırsa , onun adı ədalət olmur.
Bir sözlə haqsızlıq qarşısında “neytrallıq “çox vaxt haqsızlığın sakit tərəfdaşı olur.
Belə insanların sonu isə tək görünməyən bir təklik olur.Çünki illərlə hamını “yola verməyə “ çalışarkən heç kimin qəlbində həqiqi yer qazana bilmirlər.”Nə ət ,nə də balıq “olmayan insanlar sonunda heç nə ola bilmirlər.
Haqq ümidilə üz tutub ,manipulyasiya ilə qarşılaşıb ,əliboş qayıdan insan bir də çətin ki ,o səmtə üz tuta..Beləliklə də ,gözündə böyütdüyü insanın daxili “kiçikliyinə” baxıb məyus olurlar.
Mövqesiz insanlar , izsiz yaşayanlardır.
Yadda saxlamaq lazımdır ki , vaxtında göstərilən ədalətli bir mövqe daş üstünə yazılan yazı kimi, həm tarixdə və həm də yaddaşlarda yaşayır.
Bir şeyi də unutmayaq ki , bu cür mövqesiz insanların rəyi ancaq arxa planda,gizlində və imkan tapan kimi öz lehinə uyğun olur. Deməli ,bu tip insanlar ancaq özlərini düşündüklərini sanaraq həyatda çox şeylərini itirdiklərini belə anlamırlar.