Abşeron rayonunda Vətən müharibəsi şəhidi kəşfiyyatçı-kapitan Veysəl Musibov Yadulla oğlunun anadan olmasının 35-ci ildönümü qeyd edilib.

Turaztv.az AZƏRTAC -a istinadən xəbər verir ki, tədbirdə rayonun hüquq-mühafizə orqanlarının rəhbərləri, şəhid ailələri, müharibə iştirakçıları və məktəblilər iştirak ediblər. İştirakçılar Xırdalan şəhərindəkı Şəhidlər xiyabanında şəhid Veysəl Musibovun məzarını ziyarət edib, üzərinə tər çiçəklər düzərək xatirəsini ehtiramla anıblar.

Çıxışlarda bildirilib ki, Müzəffər Ali Baş Komandanı İlham Əliyevin uzaqgörən siyasəti, qətiyyətli iradəsi və rəhbərliyi, şəhidlərimizin və qazilərimizin qəhrəmanlığı ilə xalqımız döyüş meydanında düşmənə qalib gəldikdən sonra Qarabağa həyat yenidən qayıdıb. İşğaldan azad olunmuş rayon və kəndlərimiz bir-birinin ardınca bərpa olunur, soydaşlarımız öz dogma yurdlarına qayıdırlar.

Abşeron Rayon İcra Hakimiyyətinin başçısı Abdin Fərzəliyev çıxışında şəhidlərin adlarının əbədiləşdirilməsi istiqamətində müxtəlif layihələrin həyata keçirildiyini qeyd edib. O, Vətən Müharibəsi Qəhrəmanı Veysəl Musibovun şərəfli ömür yolunun gənc nəsil üçün nümunə olduğunu diqqətə çatdırıb.

Daha sonra tədbir şəhidin adını daşıyan Xırdalan şəhər 5 saylı tam orta məktəbdə davam etdirilib. Məktəblilər şəhidlər haqqında şeir və mahnılar təqdim ediblər.

Şəhidin anası Səməngül Musibova dövlət tərəfindən şəhid ailələrinə göstərilən yüksək diqqət və qayğıdan danışıb.

Qeyd edək ki, Prezident İlham Əliyevin sərəncamları ilə Veysəl Musibov “Vətən Müharibəsi Qəhrəmanı”, “Vətən uğrunda”, “Cəbrayılın azad olunmasına görə”, “Kəlbəcərin azad olunmasına görə”, “Qubadlının azad olunmasına görə”, “Xocavəndin azad olunmasına görə” və “Füzulinin azad olunmasına görə” medallarına layiq görülüb.