Vətəndaş müraciətlərinin operativ həlli ilə bağlı verilmiş göstərişlərə uyğun olaraq Abşeron rayonunda vətəndaş qəbullarının keçirilməsi davam etdirilir.

Turaztv.az AZƏRTAC-a istinadən xəbər verir ki, Abşeron Rayon İcra Hakimiyyətinin inzibati binasında, o cümlədən rayonun Saray, Masazır, Hökməli, Fatmayı, Görədil, Ceyranbatan, Güzdək, Pirəkəşkül, Novxanı kənd və qəsəbələrində keçirilən səyyar qəbullarda rayon icra hakimiyyətinin başçısı Abdin Fərzəliyev, hüquq-mühafizə orqanlarının və xidmət təşkilatlarının rəhbərləri, şəhid ailələri, qazilər və sakinlər iştirak ediblər.

Görüşlərdə Abdin Fərzəliyev Azərbaycan Respublikasının Prezidenti İlham Əliyevin Sərəncamı ilə elan edilmiş “Heydər Əliyev İli” çərçivəsində rayonda həyata keçirilən tədbirlər barəsində geniş məlumat verərək qeyd edib ki, bu gün ölkəmizin əldə etdiyi bütün uğurların əsası Ulu Öndər Heydər Əliyev tərəfindən qoyulub.

Ümummilli Lideri xalqımızın böyük sevgi, məhəbbət və hörmətlə yad etdiyini söyləyən rayon icra hakimiyyətinin başçısı Prezident, Müzəffər Ali Baş Komandan İlham Əliyevin rəhbərliyi ilə işğaldan azad olunan torpaqlarımıza soydaşlarımızın artıq qayıtmağa başladığını, bu ilin yay aylarında laçınlıların da öz dədə-baba yurdlarına dönəcəyini vurğulayıb.

Həmçinin görüşlərdə Azərbaycan Ermənistanla sərhəddə, Laçın-Xankəndi yolunun başlanğıcında sərhədçilərimizin qurduğu sərhəd-buraxılış məntəqəsinin əhəmiyyətindən danışılıb.

Qəbullarda sakinlər tərəfindən qaldırılan bir sıra məsələlər yerində həll olunub, digərlərinin həlli istiqamətində isə müvafiq tapşırıqlar verilib.

Məlumat üçün bildiririk ki, vətəndaş məmnunluğunu artırmaq və xidmət keyfiyyətinin yaxşılaşdırılmasının təmin olunması məqsədilə vətəndaşlar “Rəqəmsal İcra Hakimiyyəti” (https://rih.gov.az) portalına daxil olmaqla müraciət imkanı əldə edə bilərlər.