“Bu hadisə mətbuatda çıxdıqdan sonra federasiya rəhbərliyi Nurməhəmməd Hacıyevin ailəsi ilə əlaqə saxlayıb, cinayətin necə törədildiyini və güləşçinin günahının olub-olmadığını öyrənməyə çalışıb”.

Bunu Oxu.Az-a Azərbaycan Güləş Federasiyasından (AGF) bildiriblər.

Azərbaycanın sərbəst güləş üzrə millisinin üzvü Nurməhəmməd Hacıyev Dağıstanın Daxili İşlər Nazirliyi tərəfindən axtarışa verilib. Milliyyətcə avar olan 24 yaşlı Hacıyev Surakat və Hüseyn Asiyatilov qardaşları ilə birgə iyunun 23-də Abdulbəşir Ömərovu qətlə yetirməkdə şübhəli bilinir.

Lakin ailəsindən AGF-yə bildiriblər ki, oğulları bu cinayətdə sadəcə şahid olub:

“Cinayət ailə-məişət zəminində baş verib. Nurməhəmməd özü bu cinayətdə birbaşa iştirak etməyib, sadəcə, hadisəyə şahidlik edib. Hazırda araşdırma gedir. Federasiya da bu araşdırmanı yaxından izləyəcək”.

Qeyd edək ki, Nurməhəmməd Hacıyev Azərbaycan adından yeniyetmə, gənclər (iki dəfə) və 23 yaşadək güləşçilərin Avropa çempionu olub. O, böyüklər arasında Avropa çempionatının və II Avropa Oyunlarının mükafatçısıdır.