Cəmil Zəbhullaoğlu – 65

Bizim Cəmil Zəbhullaoğlu - qədim Şamaxımızın söz sərkərdəsi, insanlıq cövhəri olan Cəmilimiz də ömrünün 65-ci mərtəbəsinin kandarındadır, könül verdiyi illərin sürət qatarı onu (da) bir sakin kimi 1-dən 65-ə çatdırıb. Fəqət, bəlkə də bu, ona yuxu kimi gəlir; yəni, 65 yaşına nə vaxt yetdi, müdrik yaşına nə vaxt salam verdi, arxadakı illəri necə yola saldı və s. Xoşbəxtdir ki, 65 illik ömründə yalan-yanlış (məna) yoxdur, hətta zərrəbinlə (lupa ilə) də baxsaq, xırda bir yanlış tapmarıq. Nə üçün? Çünki Cəmil müəllim övliya (tütyə) bir kişinin oğludur...
Söz yox, ideal, nöqsansız tək Allahdır. Ancaq (unutmayaq ki,) Allah insanlardan bir neçəsini özünəbənzər yaradır...
Bax, bizim Cəmil Zəbhullaoğlu belələrindəndir...
Cəmil Zəbhullaoğlu (Cəmil Zəbhulla oğlu Dadaşov), mənbənin də dediyi kimi, 1961-ci il avqustun 9-da Şamaxı şəhərində anadan olub. Tanınmış Azərbaycan jurnalisti və satirik şairdir. Hazırda "Ədalət və həqiqət" qəzetinin və "Turaz.tv" xəbər saytının baş redaktorudur. Yaradıcılığı əsasən vətənpərvərlik, təbiət və ictimai mövzuları əhatə edir. Xocalı soyqırımı və Qarabağ müharibəsi haqqında əsərləri ilə tanınır. Cəmiyyətdəki nöqsanları tənqid edən satirik yazıları ilə də məşhurdur. Eyni zamanda, elm və təhsil mövzularında da sanballı məqalələri var. O, həmçinin, qadınların cəmiyyətdəki rolu kimi sosial mövzularda da müsbət fikirləri ilə seçilir və s.
Qısa tərcümeyi-halından (da) bəlli olur ki, inşallah, bu il avqustun 9-da Şamaxımızın parlaq zəkalı oğlu, istiqanlı şairi və jurnalisti, həm də mülayim, utancaq, eyhamçı, satirik “bomba”sı Cəmil Zəbhullaoğlunun 65 yaşı tamam olacaq. Yəni, düppədüz 1 il (boyu) Cəmil müəllim özünün şərəfli yubiley yaşını qeyd edəcək...
Cəmil Zəbhullaoğlunun yubiley yaşına qısa bir rakurs etmək istədik, nədənsə, yadımıza onun məşhur “Gənclik illəri” şeiri düşdü.
Şeir belədir:

Nə tez ötüb keçdi ömürdən illər,
Qocalıq suyunda boyanmışam mən.
Uşaqlıq ötübdür, cavanlıq solub,
Vida sərhədində dayanmışam mən.

Çevrilib baxanda bir daha geri,
Seyr edir xəyalım doğma elləri.
Paklıq, halallığın göynəyir yeri,
Ötür həyatımın gənclik illəri.

Bəlkə də xoş günlər arxada qaldı,
Ona nə şər çatar, nə haray çatar.
Cəmil, neçə fikrə, xəyala daldı,
Çətin ki, saflığa o, haram qatar.

Bu şeirdə, demək olar ki, Cəmil müəllim özünü, öz həyatını poetik təqdim edib. Bu şeir tütyə bir kişinin oğlu, əsl insan Cəmil müəllimin bir növ, özünün özünə etirafıdır.
Əslində, bu şeirdə şüuri fikir batini məqsəddədir, (bu şeir) müəllifin səmimi etirafının ideal haqqıdır. Biz buradakı dürüst qənaəti Cəmil müəllimin pak zatının diqtəsi kimi də yozmaq iqtidarındayıq. Çünki biz heç vaxt onu təməlsiz iddiada görmədik, bura qədər nə aşıladısa, istedadının gücü ilə aşıladı - əxz etdi...

Cəmil müəllim sözə vurğun olduğu qədər də insanlara vurğundur. O, hələ ki, yaxşılıq etməkdən, yaxşı düşünməkdən bezməyib, düşüncəsi hələ də parlaq libasdadır. Onun qəlb aynasında ancaq işıq görürük. O, belə deyək, Allahı, Allah sevgisini cəmiyyətə göstərən işıqlı (bir) Aynadır...
Bir insan ki, həm doğulduğu bölgədə, həm də fəaliyyət göstərdiyi əhatədə birmənalı qarşılanır, haqqında yalnız xoş fikirlər deyilir, deməli, həqiqi insandır, içində Allah xofu və mərhəmət... var. Biz (bu rakursda) Cəmil müəllimi həm Şamaxıda, həm də Bakıda məhz belə gördük, belə sezdik...
Cəmil müəllim şamaxılıdır, demək ki, həm də klassik janra müraciət edir. Onun Sabiranə yazdıqları buna misaldır.
Məsələn:

Getdi abır, getdi həya, getdi ar,
Qalmadı heç kimsədə bir ixtiyar.
Günbəgün artır, çoxalır modalar,
Lüt dolanır, guya ki, azaddı bu.
Bu, nə modadı, nə cürə zatdı bu.

Bu hay-harayda bir Sabir ürəyi, bir Sabir təntənəsi var. Cəmil müəllim eyham silahı ilə cəmiyyəti dopdoğru yerindən vurur, təəssüfünü gizlətmir...
Qısaca olaraq deyək ki, Cəmil Zəbhullaoğlu şeiri ya lirik, ya da satirik təcəssümdə tənqidçi isrardadır, həqiqət timsallıdır...
Bu yazıda biz Cəmil müəllimin daha çox yubiley yaşına yer vermək əzmindəyik. Onu 65 yaşında necə xarakterizə etməliyik ki, heç bir fikrimiz səthi don geyinməsin?! Bax, bu yazının əsas missiyası bu tərəddüddür...

Hörmətli Cəmil Zəbhullaoğlu! 65 yaşına yazdığımız bu kiçik həcmli yazıda nəyi necə dedik fərqindəyik, ümumiyyətlə, dediklərimiz təhlilə oturdumu? Sözlərimizin çoxu sətiraltıdır. Poetik müdaxilələrinə eyhamçı nəzər və baxış sərgiləmək bizim üçün çox xoşdur...
Allahdan sənə can sağlığı, yeni yaradıcılıq uğurları arzulayırıq. Bu kiçik yazını bizdən yubiley yaşına bir qardaş ərməğanı hesab et!
İnşallah, Allah nəsib etsin, 80 yaşına ehtiramla salama gələk!