Öz arzuları uğrunda mübarizə aparmaq hələ kiçik yaşlarından onun " yolu" olmuşdur. Bu yolda yorulmamış, inadla arzularını reallaşdırmağa çalışmışdır. Hələ kiçik yaşlarından haqsızlığı qəbul etməmiş, həyatın reallıqlarını daha çox sevmişdir. Qarşılaşdığı həyat hadisələrini gördüyü və anladığı tərzdə qələmə alaraq rayon qəzetinə göndərərdi. Həm nəzmlə,həm nəsrlə bədii ədəbiyyat nümunələri, publisistik yazılarla dövrün məktəblilər üçün ən sevimli mətbuu orqanı olan " Azərbaycan pioneri" və rayonumuzun yeganə qəzeti olan " Qalibiyyət"(Sonralar qəzetin adı " Qəbələ" və " Qəbələ səsi" olmuşdur) qəzetlərində tez- tez maraqlı yazıları ilə çıxış etmişdi.Yaş üstünə yaş gəldikcə mətbuat adları dəyişir, yazdığı materiallar öz aktuallığını artırırdı.Şagirdlik çağlarında məhz Rizvan Cəbiyev, Mürşüd Dadaşov kimi qələm sahiblərinin yazılarını oxuyar, onlar kimi mübariz jurnalist olmaq istəyərdi. Bu arzusuna çatmaq üçün 4 il mübarizə aparmış, nəhayət 1980- ci ildə öz sevdiyi universitetə - ADU( hazırda BDU)- nun jurnalistika fakültəsinin qiyabi şöbəsinə qəbul olmuşdur. Elə həmin ildən " Qalibiyyət" qəzeti redaksiyasının mətbəəsində mürəttib kimi əmək fəaliyyətinə başlamış, korrektor, ədəbi işçi, məktublar şöbəsinin müdiri, məsul katib vəzifələrində çalışmışdır.
Bəzən arzular insanın yaşadığı mühitin " qurbanı" na da çevrilə bilir. Onun da bəzi arzuları ailə " qayğıları" nın kölgəsində qaldı...
Qəlbindəki " söz vulkanını" kitablara çevirmək, təhsilini davam etdirmək, elm sahəsində müəyyən titulları qazanmaq...arzularını qəlbində " dondurdu"...bəlkə illər sonra " gerçəkləşdirə " bilmək ümidilə.
Övladları böyüdü, tələbə sdı qazandı...

Bibixanım İsayeva ailəsinin yaşayış.yerini dəyişməsi ilə əlaqədar iş yerindən uzaq düşdü. Bakı şəhərində " Sağlamlıq və rifah" qəzetində bir müddət tələbə yoldaşı Zəminə xanım Cavadlı ilə birlikdə işlədi.
Övladları böyüdü, tələbə adı qazandı...Arzu- diləklərinin önəmvericisi- ömür- gün yoldaşı amansız xəstəlikdən dünyasını dəyişdi...Artıq o, arzularının reallaşmasını qəlbinə " gömdü".
Dəfələrlə " Qəbələ" qəzetindən iş təklifləri alsa da övladlarından uzaq yaşamaq istəmədi. Ancaq kitab yazmaq, Birinci Qarabağ Müharibəsi şəhidlərinin sənədli bir " dastanı" nı yazmaq onun arzusu idi.
2020- ci ilin iyun ayının sonuna yaxın sabiq iş kollektivinə qayıtdı.
Arzularını qismən də olsa həyata keçirmək istəyi övladlarını sevindirdi. O yenidən " Qəbələ" qəzeti kollektivinə qayıtdı və məsul katib kimi öz işinə davam etdi. İyul ayında baş verən Tovuz hadisələri və eloğlusu general- mayor Polad Həşimovun şəhid olması onu da sarsıtdı.O, general - mayor , Azərbaycan Milli Qəhrəmanı Polad Həşimov haqqında kitab yazmağı özlüyündə qərarlaşdırdı. Poladı tanımaq üçün onun ailəsi ilə dəfələrlə görüşdü...2021- ci ildə " İnsanlığın zirvəsi" adlı 354 səhifəlik kitab yazdı. 2023- cü ildə hərbi həkim, X T Q - nin baş.leytenantı Aqşin Ənvərli haqqında " Ağ işığın sehri" adlı 416 səhifəlik kitabı nəşr olundu.Daha sonra eloğlusu, gənc hərbiçi, anti- terror hadisələri zamanı şəhid olan Şəhriyar Əlibəyli haqqında " Qaya qartalı" adlı kiçik kitabı nər olundu. İşlədiyi qəzet səhifələrində bütün qəbələli şəhidlər, qazilər və döyüşçülə ,onların ailələri haqqında zarisovka, reportaj, oçerk və müsahibələri dərc olundu. Milli- mənəvi dəyərlər və vətənpərvərlik, şəhidlik mövzusunda 2025- ci ildə " Duyğu dənizində" şerlə kitabı nəşr olundu. Həmçinin təsisçisi və redaktoru olduğu " Zaman və həyat" adlı jurnalı da vətənpərvərlik mövzusuna həsr olunmuşdu.
Onun şəhidlər haqqında, sağlamlığını " şəhid" edən qazilər, psixoloji travmalar qazanan döyüşçü- veteranlar haqqında yazdığı hər sətirdə " göz yaşlarının " izi, scılarının hossi vardır. O şəhidlər haqqında tam səssizlik və tənha olduğu zaman, bir çox insanların şirin yuxuda olduqları zaman yazardı.Çünki onlardan yazarkən onların analarının yaşadığı hissləri yaşayaraq, göz yaşlarını kiminsə görməməsi üçün gecənin sükutlu anlarında qələmə alardı.Səhər açılanda onun üzünün və gözlərinin fərqliliyində şəhidlik mövzusunda yazdığını hiss edirdik və edirik.Dəfələrlə bu mövzuya fasilə ver,ürəyin dözməz desək də, o bizlərin - övladlarının sözünü eşitməz, bu mövzunu ömrüm varkən yazmalıyam deyərdi və deyir.Hər bir şəhid haqda heç olmasa ayrıca bir kitab yazmaq onun arzusu. Əlbəttə bu onun maddi imkanları xaricində.Ancaq arzu arzudan doğulur. Onun ən böyük arzusu nəşr olunan kitablarının tirajının çox olmasıdır...

Bu kitab " Vətənpərvərlik epopeyası" dır. Bura Qəbələ.şəhidləri- 44 günlük Vətən Müharibəsinin ,antiterror hadisələrinin şəhadət yolçuları, qazi və döyüşçü veteranlar haqqında müəllifin yazdığı , hamısı olmasa da bir çox yazıları toplanmışdır. Burada bir qəlbin döyüntüləri , bir ürəyin çırpıntı dolu anları, gözlərindən qəlbinə axan göz yaşları, bir " mənəvi" ananın acıları ilə yazılmış yazılar vardır. Bu kitab sabahkı nəsillər üçün bu günün qəhrəmanlığının sənədli tarixidir. Ən azından bir neçə nəsil yaşayan bir tarix. Tarix millətini, dövlətini sevənlər tərəfindən silinməz, şəcərələrlə nəsillərə ötürülər. Bax , bu inamla yaşayır və yazır müəllif! O müəllif sakit bir " vulkan". Övladları və işlədiyi kollektiv isə o " vulkanın " toxunulmaz sərhədləri! Şəhidlik mövzusu tarixin qan yaddaşı! Müəllif isə bu qan yaddaşını qorumağa çalışan biri...Bu mənim gerçək düşüncəm.Çünki bu müəllif mənim Anam...

Müəllifin övladları adından,
Fariz İsrayılov.