Rauf İlyasoğlu

Dövlətin əsas vəzifəsi vətəndaşın rifahını təmin etməkdir. Hər bir ailənin sosial müdafiəsi gücləndirilməli, uşaqlı ailələrə uşaqpulu verilməsi, minimum pensiyanın real yaşayış minimumuna və bazar səbətinə uyğunlaşdırılması daim diqqətdə saxlanılmalıdır. İnsanlar uzun illər işlədikdən sonra layiqli pensiya almaq istəyirlər. İş stajı tələblərinə görə pensiya ala bilməyən və yalnız aşağı məbləğdə müavinətlə dolanan insanların vəziyyəti ciddi narahatlıq doğurur.
Digər tərəfdən, cəmiyyətdə tez-tez belə bir sual səslənir: yüksək maaş və müxtəlif təminatlar alan deputatlar xalqın sosial problemlərinin həlli üçün kifayət qədər təşəbbüs göstərirlərmi? Milli Məclisdə işsizlik, aztəminatlı ailələrin durumu, pensiyaçıların dolanışığı, uşaqpulu və regionların inkişafı ilə bağlı hansı mühüm təkliflər irəli sürülüb?
Bu gün 40 yaşdan yuxarı minlərlə insan iş tapmaqda çətinlik çəkir. Gənclər isə iş və yaşayış imkanlarının məhdudluğu səbəbindən ölkəni tərk etməyə üstünlük verirlər.
Çıxış yolu yeni istehsal sahələrinin yaradılması, kənd təsərrüfatının inkişafı, bölgələrdə iş yerlərinin açılması və sahibkarlığın dəstəklənməsidir.
Narahatlıq doğuran məsələlərdən biri də narkomaniyanın yayılmasıdır.
Hər bir deputat seçildiyi dairədə bu bəla ilə mübarizə üçün hansı təşəbbüsləri göstərdiyini cəmiyyətə izah etməlidir. Gənclərin sağlam gələcəyi siyasi mübahisələrdən daha vacibdir.
Təəssüf ki, bəzən ictimai müzakirələrdə ciddi problemlər əvəzinə mənasız və məsuliyyətsiz açıqlamalar gündəmə gəlir. Belə çıxışlar insanların real sosial qayğılarını arxa plana keçirir və cəmiyyətdə narazılıq yaradır.
Xalqın gözləntisi sadədir: sosial ədalət, layiqli yaşayış, iş yerləri, şəffaf idarəetmə və seçicisinin yanında olan deputat.
Millətin etimadı yalnız sözlə deyil, əməli fəaliyyətlə qazanılır.