Turaztv.az xəbər verir

Vahid Xanalıyev 1941-ci il dekabrın 17-də Şamaxı şəhərində anadan olub. S.M.Qənizadə adına Şamaxı şəhər 1 saylı orta məktəbi bitirdikdən sonra Bakı şəhərində əmək fəaliyyətinə başlayıb. 1960-1963-cü illərdə hərbi xidmətdə olmuş, tərxis edildikdən sonra Bakı Dövlət Universitetinin tarix fakültəsini qəbul olaraq oranı fərqlənmə diplomu ilə bitirmişdir. Vahid müəllim Universiteti bitirdikdən sonra bir müddət Şamaxıda C.Cəbrayılbəyli adına şəhər 5 saylı orta məktəbdə çalışmış, elmə olan marağı onu D.Bünyadzadə adına Azərbaycan Xalq Təsərrüfatı İnstitutunun (indi Azərbaycan İqtisad Universiteti) iqtisadi tarix kafedrasının aspiranturasına gətirib çıxarmışdır. Aspiranturanı uğurla bitirən Vahid Xanalıyev Şamaxıda S.Ə.Şirvani adına Diyarşünaslıq muzeyinə direktor təyin edilmişdir. Yüksək elmi-pedaqoji hazırlığa malik olan Vahid müəllim bu illərdə həm də təşkilatçılıq qabiliyyəti ilə diqqəti cəlb edir və dövlət qulluğuna irəli çəkilir. Öncə rayon partiya komitəsinə təlimatçı, təşkilat şöbəsinin müdiri, 1978-1980-ci illərdə M.Ə.Sabir adına Şamaxı Pedaqoji Texnikumunun direktoru, 1980-1982-ci illərdə Şamaxı Şəhər Sovetinin sədri, 1982-1989-cu illərdə "Şamaxı" üzümçülük sovxozunun direktoru, 1989-1991-ci illərdə yenidən Şamaxı Şəhər Sovetinin sədri, 1991-2000-ci illərdə N.Tusi adına Azərbaycan Dövlət Pedaqoji Universitetinin Şamaxı filialında direktor müavini, 2000-ci ildən 2013-cü ilədək isə 85 saylı Şamaxı Dairə Seçki Komissiyasının sədri kimi məsul vəzifələrdə çalışmış, dövlətin ona göstərdiyi etimadı doğrultmuşdur.
Vahid Xanalıyev həm də qayğıkeş ata və ailə başçısı idi.
Rayon ictimaiyyəti adından Vahid Xanalıyevin vəfatından kədərləndiyimizi bildirir, ailəsinə dərin hüznlə başsağlığı veririk.

Allah rəhmət eləsin!