Fevralın 17-də İsrailin hərbi-siyasi kabineti Qəzza zolağından girovların azad edilməsi və atəşkəslə bağlı razılaşmanın ikinci mərhələsini müzakirə etmək üçün toplanacaq.

"Turaztv.az" “Report”-a istinadən xəbər verir ki, bunu İsrailin baş naziri Benyamin Netanyahu ABŞ prezidenti Donald Trampın Yaxın Şərq üzrə xüsusi nümayəndəsi Stiven Uitkoffla telefon danışığı zamanı deyib.

Eyni zamanda Netanyahu danışıqlar qrupuna Qəzza sazişinin sonrakı icrasını müzakirə etmək üçün fevralın 17-də Qahirəyə getməyi tapşırıb.

Yanvarın 15-də Qətər Dövlətinin Baş naziri və xarici işlər naziri Şeyx Məhəmməd bin Əbdülrəhman bin Casim Al Tani bəyan edib ki, İsrail və HƏMAS Doha, Qahirə və Vaşinqtonun vasitəçilik səyləri nəticəsində Qəzzada saxlanılan girovların azad edilməsi və anklavda atəşkəs haqqında razılığa gəliblər.

Üç mərhələni əhatə edən saziş yanvarın 19-da qüvvəyə minib, birinci mərhələ 42 gün ərzində həyata keçiriləcək. Tərəflər hələ fevralın 3-də başlaması planlaşdırılan sazişin icrasının ikinci mərhələsi üzrə danışıqlara başlamayıb.