Serbiyada minlərlə insan paytaxt Belqraddan sonra ölkənin ikinci böyük şəhəri olan Novı Sadda etiraz aksiyası keçirib.

Turaztv.az AZƏRTAC-a istinadən xəbər verir ki, əsasən tələbələrdən ibarət olan nümayişçilər şəhərdən keçən Dunay çayı üzərindəki üç körpüyə toplaşıb, nəqliyyatın hərəkətini dayandırıblar. Etirazçılar ötən il noyabrın 1-də Novı Sad şəhərindəki dəmiryolu vağzalında 15 nəfərin ölümü, 2 nəfərin ağır yaralanması ilə nəticələnən qəzadan 3 ay keçməsi ilə əlaqədar bu addım atıblar. Nümayişçilər axşam saatlarında şəhər meydanına toplaşıb, insidentsiz dağılıblar.

Novı Sad dəmiryolu vağzalında faciə Serbiyada gündəmi formalaşdırmaqda davam edir. Hadisədən ötən dövr ərzində, eləcə də etiraz aksiyaları başlayandan bəri tikinti, nəqliyyat və infrastruktur naziri Qoran Vesiç, daxili və xarici ticarət naziri Tomislav Momiroviç, Baş nazir Milos Vuçeviç, eləcə də Novi Sad şəhərinin bələdiyyə sədri Milan Dyuriçin istefa veriblər. Serbiya Prezidenti Aleksandar Vuçiç hökumətin yenidən formalaşdırılacağını bildirib.

Aleksandar Vuçiç ötən günlərdə etirazçıların bütün tələbələrini yetirib, o cümlədən Belqraddakı aksiya zamanı saxlanılan 13 nəfərin əfv olunması barədə qərar qəbul edib. Yaxın günlərdə ölkədə seçkilər keçirmək və ya yeni hökumətin formalaşdırılması barədə qərar qəbul olunacağı gözlənilir.