ŞEİR PƏRVANƏSİ - Səkinə BAYRAMOVA

Xəbərlər

6.02.2022, 21:06

ŞEİR PƏRVANƏSİ - Səkinə BAYRAMOVA

Ş E İ R
P Ə R V A N Ə S İ

Pərvanə oda yandı
Od tutdu o da yandı.

Bəli,Solmaz Şirvanlı bir şeir pərvanəsidir.Feyzbuk səhifələrində təkrarsız,kimsəni təqlid etməyən Solmaz Şirvanlı imzasını tanımayan oxucu azdır.İllərdir bu şeir aşiqi dövlət qurumlarından heç bir mükafat ,ödül gözləmədən yazıb-yaradır.
Həyatda tale,qismət payından yarımayan,ömür-gününü yalnız ədəbiyyata bağlayan Solmaz xanım "mənim oğlum da,qızım da,ailəm də şeirdir" deyir.
Solmaz Şirvanlı Ədilova Ağaxan qızı 1955-ci ildə Şamaxının Ovculu kəndində doğulmuşdur.
Orta məktəbi həmin kənddə fərqlənmə ilə bitirmişdir.
1976 cı ildən başlayaraq məqalələri ,publisist yazıları həm rayon,həm də Respublika mətbuatında dərc olunmağa başlamışdır.1994-1996 cı illərdə yazdığı şeirlərini çap etdirmək arzusu ilə Musa Yaqubla görüşmüş,ustad şair onu redaktoru olduğu "Cavanşir yurdu "qəzetinə gətirmiş və Solmaz xanım bir müddət bu qəzetdə çalışmışdır.
Solmaz xanım daima ictimai işlərdə öncül olmuşdur.İstər rayon,istərsə də ölkəmizdə keçirilən tədbirlərdə fəal iştirak etmişdir.
Şeirləri Türkiyə,Kərkük və Bağdatda ödüllərlə yer qazanmışdır.Onlarla mükafata layiq görülmüşdür.
Bir soyuq qış günündə dünyaya gəlsə də qəlbi həmişə bahar təravətli,ürəyi dağ çiçəkıəri kimi al-əlvan ,şeirləri nazlı gəlintək pərvazlanan şairdir Solmaz xanım.

Babaları Xaqani,Nəsimi və Seyid Əzimin şeiriyyət ruhu bu cəfakeş söz ustadının damarlarında axaraq,şairlik mənbəyi bu ədəbiyyat çeşmələrindən su içmiş,Solmaz Şirvanlı kimi tanınmışdır.
Onun yaradıcılığının əsasını vətənpərvərlik mövzusu təşkil edir.
İkinci Qarabağ-Vətən savaşı başlayan gündən o ,qələmini süngiyə çevirdi.Torpaqlarımızı al qanları ilə suvaran igid oğullarımızı qələbəyə səsləyən şeirlər yazdı.Ölməz şəhidlərimizə qələmi ilə ağılar qoşdu.Və tezliklə bayatıları,ağıları musiqiyə çevrilib,qanad açdı.
Tanınmış sənətçi Yaqub Zurufçu onun sözlərinə yazılmış Şəhidlər mahnısını ürək sızıltısı ilə ifa edərək,şəhidlərə sanki Solmaz Şirvanlının laylasını deyirdi.
Ürəyində bütün şəhidlərin dərdini gəzdirən,şeir yazarkən qəlbinin atəşini söndürən Solmaz xanım dövrünün qadın yazarları arasında mən bir ədəbiyyatşünas alim olaraq deyərdim ki, ən istedadlı,özünəməxsus üslubu olan söz aşiqidir.
Bu gün dəyərli ustad,publisist Solmaz Şirvanlının həm də doğum günüdür.Şairlər yüz il yaşasa belə yenə azdır.
Mən də Solmaz xanıma Uca Rəbbimdən sağlıqlı,mənalı,yaradıcılıq uğurları ilə dolu olan 100 il ömür arzu edirəm!

Səkinə BAYRAMOVA,
Filologiya elmləri doktoru