Gömrükçülər külli miqdarda narkotik vasitə aşkarlayıb.

Dövlət Gömrük Komitəsinin Mətbuat və İctimaiyyətlə Əlaqələr İdarəsindən AZƏRTAC-a bildirilib ki, Şimal Ərazi Baş Gömrük İdarəsinin Əməliyyat və təhqiqat şöbəsinə Rusiyadan Azərbaycana qaçaqmalçılıq yolu ilə nəqliyyat vasitələrində narkotik vasitələrin və psixotrop maddələrin göndərilməsi barədə məlumat daxil olub. Məlumata əsasən “Samur” gömrük postu vasitəsilə ölkəyə gələn Azərbaycan vətəndaşı Namazov Zaur Vaqif oğlunun idarə etdiyi və Rusiyadan Azərbaycana “dərman vasitələri” yükünün daşındığı 99-SS-807/99-ZH-807 dövlət nömrə nişanlı, “Scania” markalı yük-nəqliyyat vasitəsinə gömrük baxışı keçirilib. Yoxlama zamanı avtomobilin kabinəsində sürücü üçün nəzərdə tutulan yataq yerinin üzərində bir ədəd şahmat lövhəsinin içərisindəki boşluqda malların aşkar edilməsini çətinləşdirən üsullardan istifadə etməklə gömrük nəzarətindən gizlədilən, tərkibində psixotrop maddə “metilendioksimetamfetamin”nin (MDMA) olduğu ümumi sayı 2934 ədəd həblər və 39 ədəd həb qırıqları, xalis çəkisi 97 min 280 qram təşkil edən psixotrop maddə “amfetamin”, xalis çəkisi 254 min 790 qram təşkil edən psixotrop maddə “mefedron” və xalis çəkisi 198 min 940 qram təşkil edən narkotik vasitə “kokain” aşkarlanıb.
Faktla bağlı araşdırma aparılır.