Xəbərlər
28.09.2026, 01:01
Afiq Göyçəli : Yol ölçürsən paxıllığın taxtına - FOTO
Ay azmış
Hikkəliyin sığışmayır bədənə,
Haçan adam olacaqsan, ay azmış?
Nə vaxtadək göyün yeddi qatında
Qara bulud qalacaqsan, ay azmış?
Düş yerə, bir insanlığa qarış sən,
Bu yaşında niyə kalsan, nə çiysən?
Pis olmaz ki, xislətini dəyişsən,
Yoxsa kal-kal solacaqsan, ay azmış.
Zəmanənin çətinisən, çətini,
Əməllərin tökür üzün ətini.
Hörmətini dadsız edib, şitini
Ayaq altda salacaqsan, ay azmış.
Ağlın gedib, bənzəmisən əfələ,
Kölgələrlə vuruşursan sən hələ.
Öz kinini calamısan əngələ,
Öz kirinə dolacaqsan, ay azmış.
Nə qalıbdır ömrün xəzan vaxtına?
Yol ölçürsən paxıllığın taxtına.
Çox mindirsən Afiqi cin atına,
Ruha şillə alacaqsan, ay azmış!
27.09.2026-cı il
Son xəbərlər
Ən çox oxunanlar
- Bu gün
- Bu həftə
- Bu ay
