27 Sentyabr – Anım Günü ilə əlaqədar Qaradağ Rayon İcra Hakimiyyətinin başçısının səlahiyyətlərini icra edən, başçının birinci müavini Emil Abbasov, rayonun hüquq-mühafizə orqanlarının rəhbərləri, Şura üzvləri, şəhid ailələri və qazilər, rayon icra hakimiyyətinin rəsmiləri, ictimaiyyət nümayəndələri Qaradağ rayonu, Lökbatan qəsəbəsində yerləşən Şəhidlər Xiyabanını ziyarət ediblər.

"Unikal" xəbər verir ki, ziyarət zamanı Vətənimizin ərazi bütövlüyü və suverenliyi uğrunda canlarından keçmiş şəhidlərin məzarları önünə əklil və gül dəstələri qoyulub, onların əziz xatirəsi ehtiramla yad edilib və ruhlarına dualar oxunub.

Qeyd olunub ki, 27 Sentyabr – Anım Günü Azərbaycan xalqının yaddaşında Vətən müharibəsinin başlandığı, xalqımızın birlik və həmrəylik nümayiş etdirərək torpaqlarımızın işğaldan azad olunması uğrunda mübarizəyə qalxdığı şanlı bir tarix kimi xüsusi yer tutur. 44 günlük Vətən müharibəsində Azərbaycan Ordusunun göstərdiyi qəhrəmanlıq, şəhidlərimizin canı və qanı bahasına qazanılan tarixi Zəfər xalqımızın milli qürur mənbəyinə çevrilib.

Daha sonra Lökbatan qəsəbəsindəki “Şəhidlər” abidə kompleksi ziyarət edilərək abidə önünə əklil və çələnglər qoyuldu.

Anım Günü ilə əlaqədar rayonun müxtəlif ərazilərində saat 12:00-da bir dəqiqəlik sükut elan olunub. Vətəndaşlar həyatlarını Azərbaycanın müstəqilliyi və ərazi bütövlüyü uğrunda fəda edən şəhidlərimizin xatirəsini dərin ehtiram və minnətdarlıq hissi ilə yad ediblər.

Bir dəqiqəlik sükut şəhidlərimizin əziz xatirəsinin xalqımızın qəlbində və yaddaşında əbədi yaşayacağının, onların göstərdiyi misilsiz qəhrəmanlığın daim ehtiramla anılacağının ifadəsi olub.

Şəhid ailələrinin üzvləri şəhid ailələrinə göstərdikləri diqqət və qayğıya görə Azərbaycan Respublikasının Prezidenti cənab İlham Əliyevə və Azərbaycan Respublikasının Birinci vitse-prezidenti Mehriban xanım Əliyevaya öz minnətdarlıqlarını ifadə edib və qazanılan qələbədə övladlarının da payı olduğu üçün fəxr etdiklərini bildiriblər.

Vətən yolunda canından keçən şəhidlərimiz hər zaman qəlbimizdə yaşayacaq və onların qanlarıyla azad etdikləri torpaqlarımızı göz bəbəyi kimi qoruyacağıq. Şəhidlərimizlə qürur duyur onlara Allahdan rəhmət, ailələrinə səbir diləyirik.