Xəbərlər
27.09.2026, 00:05
Əlövsət Saldaş : Ən gözəl şerimi Yurdda yazacam - FOTO
Daha az sızılda - ləli dağ deyə...
Bir gün yürüyəcəm Dəlidağ deyə,
Şeirin gözəlin orda yazacam.
Üst - üstə qalanıb, qarı yerdədir,
Doyunca yağdırıb varı, yerdədir.
Sözün ən gözəli Sarı yerdədir,
Şeirin gözəlin orda yazacam.
Tək tənha Murovun başına çıxıb,
Qoşqarın, Keytinin tuşuna çıxıb,
Qartalın qonduğu daşına çıxıb,
Şeirin gözəlin orda yazacam.
Son ucu görünmür, lələ, "hələ"min,
Batmışam içində borcun, sələmin.
Hələ ki sözümə baxmır qələmim,
Haçansa bir gözəl şeir yazacam.
Bilirəm axırda - sonda gələcək,
İlhamım bir ayrı donda gələcək.
İlahi misralar onda gələcək,
Haçansa bir gözəl şeir yazacam.
Arılar güllərin şəhdin əməndə
ruhum dilə gələr yorğun bədəndə.
Tərtər sahilində, şehli çəməndə
Ən gözəl şerimi orda yazacam.
Davam olmayacaq daha heç kimlə..
Atımla, itimlə, qoyun - keçimlə
baş alıb gedəcəm Yurda köçümlə,
Ən gözəl şerimi orda yazacam.
Misra kasadlığım, kəlmə azlığım
sezilir, çaşdığım, harda azdığım.
Əlövsət, ağrıdır burda yazdığım,
Ən gözəl şerimi Yurdda yazacam.
Son xəbərlər
Ən çox oxunanlar
- Bu gün
- Bu həftə
- Bu ay
