Xəbərlər
26.09.2026, 22:35
Sevinc Yunuslu : Sənə dönən yolum Laçından keçir - FOTO
Bilirsən necədi , necədi sənsiz?
Laçın..Həkəri çay..gecə..darıxmaq..
Gözümdə bu külli- aləmin cəmi
Heçdi heç, heçdi heç, heçdi, ay axmaq!
Sinəmə buz gəldi qəmin vurduğu
Kəsildi ömrümə qənim, vurduğun
El vursa vız gələr, sənin vurduğun -
Tuşdu tuş , tuşdu tuş , tuşdu , ay axmaq!
Sənsən son aldığım nəfəs, içimdə-
bir sərçə rəqs edir həvəs içində.
Ürəyim ovcunda, qəfəs içində
Quşdu quş, quşdu quş, quşdu, ay axmaq!
Mən ömür sürmürəm, ömür gödəkdi.
Sənsizlik geydiyim qanlı köynəkdi .
Ölüm də, həyat da , bircə qədəhdi,
Puçdu puç , puçdu puç, puçdu, ay axmaq!
Nədir bu buludlar sinəmə sinən?-
Yığışdır göylərdən, önün kəsginən.
Elə bil ürək yox bağrında sinən
Daşdı daş, daşdı daş, daşdı, ay axmaq!
Ey qara gözləri bir tikə üzüm,
Mən necə səbr edim, mən necə dözüm?!
Sənsiz milyon ildi göylərin gözü-
Yaşdı yaş, yaşdı yaş, yaşdı ay axmaq!
Gözümdə bu külli- aləmin cəmi
Heçdi heç, heçdi heç, heçdi, ay axmaq!
Sənə dönən yolum Laçından keçir
Gecdi gec, gecdi gec, gecdi , ay axmaq!
Son xəbərlər
Ən çox oxunanlar
- Bu gün
- Bu həftə
- Bu ay
