Meksika hökuməti 2026-cı il büdcə təklifinə zorakılıq ehtiva edən videooyunları vergiyə cəlb edib. Bu vəsait onların həddindən artıq istifadəsi ilə bağlı psixi pozuntuların müalicəsini maliyyələşdirmək üçün istifadə olunacaq.

Turaztv.az AZƏRTAC-a istinadən xəbər verir ki, hökumətin hesablamalarına görə, bu tədbir sayəsində gələn il təxminən 10 milyon dollar gəlir əldə ediləcək.

Meksika Maliyyə Nazirliyi bildirib ki, hökumət sağlamlıq siyasətinin bir hissəsi kimi zorakılıq ehtiva edən videooyunlara vergi tətbiq etməyi və onlardan istifadə ilə bağlı xəstəliklərin müalicəsini maliyyələşdirməyi planlaşdırır. Nazir Edqar Amador vurğulayıb ki, bazar ertəsi təqdim edilən 2026-cı ilin büdcə təklifinə daxil olan tədbir tütün və şəkərli içkilərə xüsusi vergilərin tətbiqi ilə paralel gedir.

O, mətbuat konfransında deyib ki, yeni vergilər “vergi siyasətinin deyil, sağlamlıq və təhlükəsizlik siyasətinin bir hissəsidir”. Maliyyə Nazirliyi videooyunların hansı meyarlara görə vergiyə cəlb ediləcəyini açıqlamayıb, lakin vergi dərəcəsinin 8% olacağını bildirib ki, bunun nəticəsində də 2026-cı ildə 183 milyon peso (9,8 milyon dollar) vəsait yığılacağı gözlənilir.

Nazirlik büdcə təklifində qeyd edib ki, son araşdırmalara görə, “zorakı məzmunlu videooyunlardan istifadə ilə yeniyetmələrdə aqressivliyin artması, habelə təcrid və narahatlıq kimi mənfi sosial və psixoloji nəticələr arasında əlaqə var”. Maliyyə nazirinin müavini Karlos Lerma bildirib ki, bu patologiyalar insanlara “iqtisadi potensialının çox erkən mərhələsində” təsir edir, onların inkişaf imkanlarını azaldır və səhiyyə sistemləri üçün əhəmiyyətli yük yaradır.

Büdcə təklifi noyabrın 15-dək Konqresdə müzakirə edilməli və təsdiqlənməlidir.