Misir Ərəb Respublikasının Prezidenti Əbdülfəttah əs-Sisi, fransalı həmkarı Emmanuel Makron və İordaniya Kralı II Abdullah ibn Al Hüseyn yanvarın 19-dan qüvvəyə minən Qəzzada atəşkəs rejiminin bərpasına çağırıblar.

"Turaztv.az" “Report”-a istinadən xəbər verir ki, bu barədə onların Qahirədə keçirilən görüşün yekunları üzrə qəbul edilmiş bəyannamədə deyilir.

“İsrailin Qəzza zolağına hücumlarının bərpası fonunda biz dərhal atəşkəs rejiminə qayıtmağa və yanvarın 19-da qüvvəyə minmiş razılaşmanın yerinə yetirilməsinə çağırırıq”, - sənəddə vurğulanıb.

Liderlər qeyd ediblər ki, yanvarda imzalanmış saziş israilli girovların və fələstinli məhbusların azad edilməsinə və onların təhlükəsizliyinə zəmanət verir.

Onlar həmçinin bildiriblər ki, Fələstin ərazilərinin ilhaqı cəhdləri qəbuledilməzdir:

“Üç dövlətin lideri fələstinlilərin öz torpaqlarından didərgin salınması planlarını və Fələstin ərazilərini ilhaq etmək cəhdlərini rədd edir”.