BÜTÜN ADAMLARA İNSAN DEMƏYİN ...Bu günümüz üçün də aktualdır

Xəbərlər / Nesr

3.12.2022, 22:53

BÜTÜN ADAMLARA İNSAN DEMƏYİN ...Bu günümüz üçün də aktualdır - Çingiz DADAŞOV

Əziz dostlar axşamınız xeyirli olsun!Arxivimi səliqəyəyə salarkən 1984-cü ildə şeirə çevrilən duyğularımın bir parçası əlimə keçdi.O vaxtlar gənc müəllim idim.Dörd il pedaqoji stajım var idi.Müxtəlif xarakterli insanlarla təmasda olmaq,pedaqoji fəaliyyətim,eləcə də məktəb direktoru kimi çalışmağım bu şeirin yaranmasına səbəb oldu.Onda Şamaxıda mətbu orqan kimi böyük nüfuza malik "Yeni Şirvan" qəzeti çap olunurdu. (Həmin qəzetdə məqaləm çap olunmaqla kəndimizdə mağaza binası tikilib istifadəyə verildi.Digər bir məqaləmlə indi Çuxuryurd dayanacağı adlanan yerdə o vaxtlar üçün böyük hadisə olan avtobus dayanacağı az vaxtda tikilib istifadəyə verildi)Qərara gəldim ki, bu şeirimi də qəzetin redaksiyasına göndərim.Yəqin çap edərlər.Göndərdim. (Əlbəttə poçtla) xeyli vaxt keçdi cavab gəlmədi.Özüm redaksiyaya getdim.Qəzetin baş redaktoru Ə.Şükürov idi.Məni qəbul etdi.Şerimi bəyəndiyini dedi.Ancaq çap edə bilməyəcəyini söylədi.Soruşdum niyə? Dedi sən hələ cavansan.Deyəcəklər ki,ürəyindən ağsaqqallıq keçir!...Nə isə mən də bir söz deməyib getdim.
İndi fikirləşirəm ki, xeyli yaşa dolmuşam.Yəqin ki, daha irad tutan olmaz! Bu günümüz üçün də aktualdır. Ona görə də həmin şeiri ixtiyarınıza verirəm!

BÜTÜN ADAMLARA İNSAN DEMƏYİN

Hamıya aiddir adamlıq sözü,
Gəlin izah edək birgə bu sözü.
Hər kəsə adamdır desək,düz olar,
İnsandır söyləsək,xeyli səhv olar.
***
Ərəbcə "Adəm"dən yaranıb bu söz,
"Müqəvva", "fiqura" deməkdir bu söz.
Adamlar həyatda cürbəcür olur,
Rəngi qara olur,ağ,sarı olur.
***
"İnsan"sa "Üns" olub ərəb dilində,
"İnsan"a çevrilib bəşər dilində.
Ünsiyyət hər kəsin öz dilindədir,
Onun işlərində, əməlindədir.
***
Adamlar yaşayır,insanabənzər,
Adamlar yaşayır,aləmi bəzər.
Adam var ki,insanlığın naxşıdı,
Adam var ki,dindirməsən yaxşıdı.
***
Üz tutub deyirəm mən insanlara,
Həyatda vicdanla yaşayanlara.
"Adamlıq" adamın zahirindədir,
"İnsanlıq" hər kəsin daxilindədir.
***
Adamla insanı qarışdırmayın,
Bu iki məfhumu eyni sanmayın.
Hər şeir yazana şair deməyin,
Bütün adamlara insan deməyin.

25 .XI.1984. Şamaxı rayonu.Zarat kəndi.