Bu günlərdə prezident İlham Əliyevin sərəncamı ilə Azərbaycan Respublikası Prezidentinin Administrasiyasının rəhbəri Ramiz Mehdiyev vəzifəsindən kənarlaşdırıldı.

Ramiz Mehdiyevin kənarlaşdırılmasından sonra, aparatın gələcək taleyi, aparat rəhbərinin kim olacağı geniş müzakirələrə səbəb olub.

Mətbuatda gedən bəzi məlumatlarda Prezidentinin Administrasiyasında struktur dəyişikliyi olacağı, icra aparatının rəhbəri postunun ləğv olunacağı iddia edilib.

Anews.az məsələ ilə bağlı politoloqları danışdırıb.

Politoloq Fərhad Mehdiyev deyir ki, prezident administrasiyası ləğv olunmayacaq.

Onun sözlərinə görə, prezident administrasiyası konstitusion qurumdur və hər hansı qərarla ləğv oluna bilməz.



"Prezident administrasiyası prezidentin katibliyidir. Prezidentin də, vitse-prezidentin də katibliyi olur. Ümumiyyətlə, bu qurum katiblik statusunda olsa da, ölkəyə faktiki rəhbərliyi həyata keçirirdi. Nazirlər kabinetindən daha üstün qurum idi. Bu, belə olmalı deyil. Ancaq bütün hallarda prezident administrasiyası konstitusion qurumdur və hər hansı qərarla ləğv edilə bilməz. Ola bilər onun səlahiyyətlərinin bir hissəsi hansısa qurumlara verilsin, amma dəqiqdir ki, prezident administrasiyası ləğv olunmayacaq”, - deyə politoloq Fərhad Mehdiyev bildirib.

Zərdüşt Əlizadə də düşünür ki, prezident aparatı ləğv olunmayacaq.

Onun sözlərinə görə, prezidentin fəaliyyətinin operativ həyata keçirilməsini prezident aparatı təşkil edir.



"Düşünürəm ki, aparat ləğv olunmayacaq. Prezidentin fəaliyyətinin, xüsusən də iqtisadi sahədə operativ həyata keçməsini prezident aparatı təşkil edir. Ancaq bütün hallarda bürokratik və bir-birini təkrarlayan qurumlar çoxdur, prezident aparatı da elədir”, - deyə politoloq Zərdüşt Əlizadə bildirib.