Bakı Dövlət Universitetinin (BDU) rektoru Elçin Babayev 2021-2022-ci tədris ilində bu ali təhsil müəssisəsinə qəbul olunan Prezident təqaüdçüləri ilə görüşüb.

BDU-dan AZƏRTAC-a bildiriblər ki, görüşdə rektor E.Babayev qəbul imtahanlarında yüksək nəticə göstərmələri münasibətilə tələbələri təbrik edib, onlara gələcək təhsillərində uğurlar arzulayıb. O, Azərbaycan Prezidentinin təqaüdünə layiq görülmələrini onlar üçün həm böyük qürur, həm də böyük məsuliyyət olduğunu bildirib. Tələbələrin gələcəkdə bu adı layiqincə doğruldacaqlarına, xalqımıza, dövlətimizə layiqli, peşəkar mütəxəssislər kimi yetişəcəklərinə əminliyini vurğulayıb.

Sonra rektor tədrisin keyfiyyətinin yüksəldilməsi, yüksəkixtisaslı kadrların hazırlanması üçün BDU-da yaradılmış şərait haqqında məlumat verib. O, universitetin yeni inkişaf mərhələsinə qədəm qoyduğunu qeyd edərək, 2021-ci ildən “Blackboard” elektron təhsil sisteminin, yeni təlim texnologiyalarının uğurla tətbiq edildiyini diqqətə çatdırıb. Tələbələrə müxtəlif layihələrdə, Tələbə Elmi Cəmiyyətinin fəaliyyətində yaxından iştirak etməyi tövsiyə edib.

Rektor, eyni zamanda, BDU-nun tələbə təşkilatlarının fəaliyyəti, universitetdə könüllülük hərəkatı haqqında söhbət açaraq, tələbələri təhsil müəssisəsinin ictimai həyatında, sosial layihələrdə iştirak etməyə çağırıb. Onlara öz bilik və bacarıqları ilə yanaşı, ictimai fəallıqları ilə də tələbə yoldaşlarına nümunə olmağı arzulayıb.