Dünən Bakı Dövlət Universitetin (BDU) rektoru Elçin Babayev BDU-nun Hüquq fakültəsinin 2021-ci il məzunu, Azərbaycanın sərbəst güləşçisi, “Tokio-2020” Yay Olimpiya Oyunlarında ölkəmizə gümüş medal qazandıran Hacı Əliyevlə görüşüb.

BDU-dan AZƏRTAC-a bildirilib ki, rektor Elçin Babayev ölkəmizi beynəlxalq arenada layiqincə təmsil etdiyinə, olimpiadada əldə etdiyi yüksək nəticəyə görə Hacı Əliyevi təbrik edib. Görüşdə rektor ölkəmizdə idmanın inkişafına dövlət qayğısından söhbət açaraq Azərbaycanın dünyada artıq idman ölkəsi kimi tanındığını, ölkəmizdə olimpiya hərəkatının sürətlə inkişaf etdiyini bildirib. E.Babayev idmançı tələbənin nailiyyətlərini yüksək qiymətləndirərək, Azərbaycan bayrağını dəfələrlə yüksəklərə qaldırdığına görə H.Əliyevə təşəkkürünü bildirib, gələcək fəaliyyətində və peşəkar idman həyatında yeni uğurlar arzulayıb.


Hacı Əliyev göstərilən diqqətə, həmçinin dəyərli tövsiyələrinə, o cümlədən BDU-da təhsil alan gənc idmançılara göstərilən qayğıya görə rekror Elçin Babyevə təşəkkürünü bildirib.

Sonra rektor üçqat dünya və üçqat Avropa çempionu, “Tokio-2020” Olimpiya Oyunlarının gümüş mükafatçısı Hacı Əliyevə BDU-nun Fəxri fərmanını, həmçinin onun ali təhsil haqqında diplomunu və hədiyyə təqdim edib.