Rayon İcra Hakimiyyətinin başçısı Vüqar Novruzovun mədəni irsə və milli dəyərlərə göstərdiyi diqqət nəticəsində rayonda keçirilən tədbirlər zəngin tarixi-mədəni irsimizin yaşadılmasına mühüm töhfə verir.Bu qəbildən olan növbəti tədbir – Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi, Göygöl Rayon İcra Hakimiyyətinin tərəfdaşlığı və "Dədə Ələsgər Ocağı" İctimai Birliyinin təşkilatçılığı ilə həyata keçirilən “Aşıq Ələsgərin anım tədbirləri” layihəsinin yekun mərhələsi oldu.
Tədbirdə çıxış edən Vüqar Novruzov vurğulayıb ki, Aşıq Ələsgərin yaradıcılığı Azərbaycan xalqının milli kimliyinin, mənəvi dəyərlərinin və vətənpərvərlik ruhunun formalaşmasında mühüm rol oynayır. O bildirib ki, Ulu Öndər Heydər Əliyevin əsasını qoyduğu ənənə bu gün Prezident cənab İlham Əliyev tərəfindən uğurla davam etdirilir, Aşıq Ələsgərin irsi dövlət səviyyəsində yüksək ehtiramla qorunur və təbliğ edilir.
Tədbirdə çıxış edən ziyalılar Aşıq Ələsgərin zəngin irsinin tədqiqi və gələcək nəsillərə çatdırılmasının əhəmiyyətini vurğulayaraq, bu istiqamətdə həyata keçirilən layihələrin milli-mədəni irsimizin yaşadılmasına böyük xidmət göstərdiyini qeyd ediblər.
Yekunda tanınmış aşıqların ifasında Aşıq Ələsgərin sözlərinə bəstələnmiş el havaları və klassik aşıq sənəti nümunələri təqdim olunub və tədbir iştirakçıları tərəfindən böyük rəğbətlə qarşılanıb.

Göygöldə keçirilən bu mötəbər tədbir bir daha göstərdi ki, Vüqar Novruzovun rəhbərliyi ilə rayonda milli-mənəvi dəyərlərin qorunması, mədəni irsin təbliği və gənc nəslin vətənpərvərlik ruhunda tərbiyəsi istiqamətində həyata keçirilən işlər ardıcıl və məqsədyönlü şəkildə davam etdirilir. Bu cür təşəbbüslər həm Azərbaycan aşıq sənətinin inkişafına, həm də Qərbi Azərbaycan mədəni irsinin yaşadılmasına mühüm töhfə verir.

Abbas Əli oğlu Bağırov (GÖYÇƏGÖL)
Tibb üzrə fəlsəfə doktoru,
Qələbə Tibb Mərkəzi MMC-nin direktoru,Həkim provizor