“Zelenski və Putinin saziş imzalamaq üçün eyni otaqda olmasına ehtiyac yoxdur”.

“Qafqazinfo” xəbər verir ki, bunu ABŞ Prezidenti Donald Tramp Ağ Evdə jurnalistlərin suallarını cavablandırarkən deyib.

Onun sözlərinə görə, tərəflər sazişi başqa üsulla da imzalaya bilərlər.

Tramp iki liderin müqavilə imzalamaq üçün eyni otaqda olmasının zəruri olub-olmadığı barədə suala belə cavab verib: “Bu, vəziyyətdən asılıdır. Onların eyni otaqda olmasına ehtiyac yoxdur. Bunu başqa cür edə bilərlər. Onların eyni otaqda olması çətindir. Bunun necə edildiyinin fərqi yoxdur”.

ABŞ lideri Rusiyanın müharibəni davam etdirmək üçün böyük insan resurslarına malik olduğunu və Ukraynada ələ keçirdiyi əraziləri genişləndirdiyini dilə gətirib. O, Moskvanın müharibəni bitirmək istədiyini düşündüyünü desə də, Kiyevin də razılaşmaya hazır olmasının vacibliyini vurğulayıb.

Tramp Ukraynaya yüz milyardlarla dollar yardım göstərildiyini xatırladaraq, müharibənin uzanmasının ABŞ vergi ödəyicilərini bezdirdiyini bildirib. Onun fikrincə, Ukrayna münaqişəyə son qoymaq üçün razılaşma əldə etməlidir.

ABŞ Prezidenti ötən ay hər iki tərəfin ümumilikdə 32 min insan itirdiyini də bildirib. O, müharibənin davam etməsinin vəziyyəti daha da ağırlaşdıracağını söyləyərək danışıqların nəticə verməsinin vacibliyini qeyd edib.

Tramp, həmçinin, Rusiyanın müharibənin ilk mərhələsində Ukraynanı qısa müddətdə ələ keçirə bilməməsini hərbi səhvlərlə əlaqələndirib. O, Ukraynaya verilən “Javelin” tank əleyhinə silahlarının Rusiya qüvvələrinə qarşı istifadə edildiyini xatırladıb.