Rusiya noyabr ayında Ukrayna ilə bağlı üçtərəfli danışıqları bərpa etməyə hazırdır.

APA-nın Moskva bürosu xəbər verir ki, bunu Rusiya Prezidentinin beynəlxalq məsələlər üzrə köməkçisi Yuri Uşakov Sankt-Peterburqda baş tutan Putin-Uitkoff danışıqlarının yekunu ilə bağlı bildirib.

Onun sözlərinə görə, Rusiya noyabrın 10-dan sonra "münaqişə bitdikdən sonra Moskva və Kiyev üçün təhlükəsizlik sisteminin qurulması kimi əsas mövzu" üzrə Ukrayna ilə bağlı üçtərəfli danışıqları bərpa etməyə hazırdır.

Uşakov vurğulayıb ki, Uitkoff Osloda keçirilən danışıqlardan sonra Avropa və Kiyevdən yeni yanaşmalarının olduğunu bildirib, baxmayaraq ki, bu yanaşmalarda Ukrayna böhranının həlli kontekstində faydalı olan çox şey olmayıb.

“Putin Uitkoffa Rusiyanın strateji təşəbbüsə sahib olduğu təmas xəttinin obyektiv mənzərəsini təqdim edib. Rusiya qoşunları bütün əsas istiqamətlərdə hücumlar həyata keçirir və Kiyevin zərbələrinə cavab olaraq Ukraynadakı hədəfləri effektiv şəkildə məhv edir.

Putin ABŞ-ın və şəxsən Trampın Ukrayna münaqişəsinin həlli səylərini yüksək qiymətləndirdi. O, Aleşkidəki humanitar problemlərin həlli üçün göstərdiyi səylərə görə Melaniya Trampa minnətdarlığının çatdırılmasını xahiş etdi”, - Uşakov qeyd edib.

Kreml rəsmisi qeyd edib ki, Çin, əlverişli şəraitdə, Rusiya, Çin və ABŞ liderlərinin üçtərəfli görüşünü APEC sammiti proqramına daxil edəcək: “Hazırlıqlar artıq aparılır. Rusiya belə bir görüşün mümkün məzmunu ilə bağlı praktik təkliflər verib".

Uşakov görüşdə Rusiya dizel yanacağının tədarükünə xüsusi diqqət yetirildiyini də söyləyib. O bildirib ki, ABŞ ilə dizel sövdələşməsi qlobal yanacaq bazarının sabitləşməsinə töhfə verəcək.

"Putin və Uitkoff genişmiqyaslı Rusiya-Amerika iqtisadi layihələrinin həyata keçirilməsi imkanlarını ətraflı müzakirə ediblər. Bu layihələrdən bəziləri artıq həyata keçirilir.

Rusiya İran ətrafındakı vəziyyətin həllində vasitəçilik etməyə hazırdır. Putin Tehranla danışıqların mümkün və zəruri olduğunu vurğulayıb", - Kreml rəsmisi əlavə edib.

***

Kreml Ukrayna ilə bağlı üçtərəfli danışıqları bərpa etməyə hazırdır.

Bu barədə Rusiya Prezidentinin köməkçisi Yuri Uşakov bildirib.

Onun sözlərinə görə, Prezident Vladimir Putin bu gün ABŞ-ın xüsusi elçisi Stiv Uitkoff ilə görüşdə noyabrın 10-dan sonra Rusiya və Ukraynanın müharibədən sonrakı təhlükəsizlik sistemi ilə bağlı danışıqları bərpa etməyə hazır olduğunu deyib.