Abbas Bağırov,
Tibb üzrə fəlsəfə doktoru, ələsgərşünas alim


Tədbir iştirakçıları əvvəlcə Ulu Öndər Heydər Əliyevin və Azərbaycanın ərazi bütövlüyü uğrunda canlarından keçmiş şəhidlərin əziz xatirəsini bir dəqiqəlik sükutla yad ediblər.
Qərbi Azərbaycan İcması İdarə Heyətinin sədri, Milli Məclisin deputatı Əziz Ələkbərli çıxışında kitabın Azərbaycan aşıq sənətinin görkəmli nümayəndələrindən olan Daşkəndli Aşıq Nəcəfin həyat və yaradıcılığının öyrənilməsi baxımından əhəmiyyətini vurğulayıb. O, Aşıq Nəcəfin faciəli taleyinin Göyçə mahalında azərbaycanlıların üzləşdiyi tarixi hadisələrin bir hissəsi olduğunu qeyd edərək, belə nəşrlərin milli-mədəni irsin qorunmasına və tarixi yaddaşın gələcək nəsillərə çatdırılmasına xidmət etdiyini bildirib.
Kitabın müəllifi, tədqiqatçı-jurnalist, Azərbaycan Jurnalistlər Birliyinin və Azərbaycan Aşıqlar Birliyinin üzvü Araz Yaquboğlu nəşrin hazırlanması və apardığı araşdırmalar barədə məlumat verib. O bildirib ki, Daşkəndli Aşıq Nəcəf Dədə Ələsgərin sevimli şəyirdlərindən biri olub, ifaçılığı və ustadlığı ilə Azərbaycan aşıq sənətində mühüm yer tutub.
Müəllifin sözlərinə görə, 1919-cu ildə Göyçə mahalında baş verən faciəli hadisələr zamanı Aşıq Nəcəfin beş oğlu ilə birlikdə amansızlıqla qətlə yetirilməsi sənətkarın şəxsi taleyindən kənara çıxaraq xalqın tarixi yaddaşında dərin iz qoyub. Kitabda Aşıq Nəcəfin həyat və yaradıcılığı, aşıq sənətinə verdiyi töhfələr və faciəli taleyi ilə bağlı məlumatlar toplanıb. Nəşrin əsas məqsədi sənətkarın irsini araşdırmaq, onun adını və yaradıcılığını yaşatmaqdır.
Qərbi Azərbaycan İcması Ziyalılar Şurasının üzvü, Milli Məclisin deputatı Zahid Oruc çıxışında saz-söz sənətinin milli yaddaşın qorunmasındakı rolundan danışıb. O, “Sındırılmış saz, yandırılmış aşıq” kitabının yalnız bir sənətkarın taleyini deyil, həm də xalqın tarixi yaddaşını və mədəni irsini əks etdirdiyini bildirib. Zahid Oruc Aşıq Nəcəfin həyat hekayəsinin gələcək nəsillərə çatdırılmasının vacibliyini vurğulayıb.
AMEA Folklor İnstitutunun direktoru, filologiya elmləri doktoru Hikmət Quliyev çıxışında Aşıq Nəcəfin irsinin folklorşünaslıq və aşıqşünaslıq baxımından öyrənilməsinin əhəmiyyətinə toxunub. O qeyd edib ki, bu cür tədqiqatlar sənətkarların yaradıcılığının elmi dövriyyəyə daxil edilməsinə və xalq yaddaşında yaşadılmasına imkan yaradır.
Tibb üzrə fəlsəfə doktoru, ələsgərşünas alim Abbas Bağırov Aşıq Nəcəfin Dədə Ələsgər məktəbi ilə bağlılığının onun sənətkar kimi formalaşmasında mühüm rol oynadığını bildirib. O, ustad-şəyird ənənəsinin Azərbaycan aşıq sənətinin qorunub saxlanılmasında və inkişafında xüsusi əhəmiyyət daşıdığını vurğulayıb.
Qərbi Azərbaycan İcması İdarə Heyətinin üzvü, tibb elmləri doktoru, professor Qələndər Canbaxışov çıxışında Aşıq Nəcəfin həyatının və faciəli taleyinin tarixi yaddaş baxımından əhəmiyyətini qeyd edib. O, sənətkarın adının və irsinin yaşadılmasının Qərbi Azərbaycanın mədəni irsinin qorunmasının mühüm tərkib hissəsi olduğunu bildirib.
AMEA Folklor İnstitutunun dosenti İlhamə Qəsəbova Aşıq Nəcəfin yaradıcılığının folklor irsindəki yerindən danışıb. O, sənətkar haqqında aparılan tədqiqatların və bu kitab kimi nəşrlərin Azərbaycan aşıq sənətinin zənginliyinin daha geniş tanıdılmasına xidmət etdiyini vurğulayıb.
Qərbi Azərbaycan İcmasının Bərdə nümayəndəsi, Daşkənd kənd İcmasının sədri Fəzair Piriyev Aşıq Nəcəfin Daşkənd kəndinin və Göyçə mahalının tarixi-mədəni yaddaşındakı yerinə diqqət çəkib. O, görkəmli sənətkarın adının yaşadılmasının doğma yurdun tarixi və mədəni irsinin gələcək nəsillərə ötürülməsi baxımından vacib olduğunu bildirib.
Tədbirdə Aşıq Nəcəfin həyat və yaradıcılığının araşdırılması, onun sənət irsinin öyrənilməsi və gələcək nəsillərə çatdırılması məsələləri ətrafında fikirlər səsləndirilib. Çıxışlarda Azərbaycan aşıq sənətinin görkəmli nümayəndələrinin həyat və yaradıcılığının tədqiqinin, onların irsinin qorunmasının və tarixi həqiqətlərin yaşadılmasının əhəmiyyəti vurğulanıb.
Kitabın müəllifi Araz Yaquboğlu Aşıq Nəcəfin irsinin tədqiqi və nəşrin hazırlanması istiqamətində gördüyü işlərə görə Qərbi Azərbaycan İcması İdarə Heyətinin sədri, Milli Məclisin deputatı Əziz Ələkbərli tərəfindən fəxri fərmanla təltif edilib.
Sonda Aşıq Xanlar Xəlilovun saz ifası dinlənilib.
Tədbir iştirakçıların xatirə şəklinin çəkdirilməsi ilə başa çatıb.