İsrailin Baş naziri Benyamin Netanyahu Suriya Prezidenti Əhməd Əl Şaraa ilə “sərt telefon danışığı” apardığını bildirib.

“Qafqazinfo” xəbər verir ki, İsrail hökumət başçısının sözlərini “Times of Israel” nəşri yayıb.

Siyasətçinin sözlərinə görə, bu danışıqdan və Dəməşqdəki prezident sarayı ilə Baş Qərargah binasına endirilən zərbələrdən sonra Suriya hakimiyyəti ölkədə yaşayan druzlara qarşı hücumları dayandırıb:

“Dəstəyi götürüb Əl Şaraaya zəng etdim. Bu, çox qısa və sərt bir söhbət oldu və qan tökülməsi dayandı. Druz qardaşlarımızı qorumaq üçün lazım olan hər şeyi edəcəyəm. Hələ görüləsi çox iş var, hər şeyi danışa bilmərəm”.

Qeyd edək ki, bundan əvvəl Netanyahu və ABŞ Prezidenti Donald Tramp İrana qarşı yeni əməliyyatın keçirilə biləcəyini istisna etməyiblər.