Egey dənizində, Türkiyə sahillərinə yaxın yerləşən Yunanıstana məxsus Strongilo adası 5 milyon dollara satışa çıxarılıb. Təxminən 219 min kvadratmetr ərazisi, üç təbii çimərliyi və toxunulmamış təbiəti ilə seçilən ada şəxsi mülk və ya turizm layihəsi üçün potensial imkanlar vəd edir.

"Turaztv.az" “Qafqazinfo”-ya istinadən xəbər verir ki, On iki Ada arxipelaqına daxil olan Strongilo Arkoy adaları yaxınlığında, Lipsi adasının şimalında, Patmos və Leros adalarının ətrafında yerləşir.

Adada köhnə evin daş qalıqları və quyu var. Çimərliklərdən birinin uzunluğu təxminən 110 metrdir.

Satış elanında ada şəxsi yaşayış məkanı və ya lüks ekoturizm obyekti yaratmaq istəyən investorlar üçün əlverişli imkan kimi təqdim olunur. Bununla belə, ərazidə tikinti aparmaq üçün müvafiq icazələr və rəsmi təsdiqlər alınmalıdır. Su və elektrik təchizatının təşkili də ayrıca qiymətləndirilməlidir.

Adanın təbii quruluşu əsasən qorunub saxlanılıb. Buraya yalnız dəniz yolu ilə, şəxsi qayıq və ya su taksisi vasitəsilə çatmaq mümkündür. Yaxınlıqdakı Leros adasının Afina ilə hava əlaqəsi var.

Strongilo 2015-ci ildə Hollivud aktyoru Conni Deppin adanı 4,2 milyon avroya aldığı barədə xəbərlərlə gündəmə gəlib. Lakin onun hazırda adanın sahibi olub-olmadığı və əmlakla əlaqəsinin davam edib-etmədiyi təsdiqlənməyib.

Hazırda ada üçün elan edilən qiymət 5 milyon dollardır. Satışın Yunanıstan hökuməti tərəfindən həyata keçirildiyinə dair isə təsdiqlənmiş məlumat yoxdur.