Xəbərlər
8.10.2026, 11:09
BELA ZƏNGİBASARLI : QOŞULUB PAYIZIN KÜLƏKLƏRİNƏ - FOTO
Yayın istisinə əlvida deyir.
Ağaclar dəyişir yaşıl donunu,
Qızıl libasını əyninə geyir.
Havadan çox zaman baş açmaq olmur,
Buludlar tutulur, küləklər əsir.
İslanmasın deyə yağan yağışda,
İnsanlar küçədən evə tələsir.
Hər payız gələndə xəyalım uçur,
Zəngibasarıma - o doğma elə.
Görüb, yaşadığım gözəl günlərin,
Bəlkə düşməyəcək biri də ələ.
Heç vaxt damağımdan dadı getməyən,
O dadlı qovurma yadıma düşür.
Xəyalən hər ilin bu fəslində
Qazanda qovrulub, yenidən bişir.
Ocaq qalayardıq, un ələyərdik,
Qış üçün təndirdə lavaş yapardıq.
Bişənlərin ətri iştah açardı,
Dürmək düzəltməyə pendir tapardıq.
Qoşulub payızın küləklərinə,
Vətənimə sarı əsməyim gəlir.
Neçə illərdir ki, ayrı düşdüyüm,
Vətənin həsrəti, bağrımı dəlir.
07.10.2026.
Son xəbərlər
Ən çox oxunanlar
- Bu gün
- Bu həftə
- Bu ay
