Bəzən insanın ömür yolu onun yazdığı kitablardan daha böyük bir əsərə çevrilir. Elə insanlar var ki, yaşadıqları ağır sınaqlara baxmayaraq sınmır, əksinə, ağrılarını elmə, biliyə, yaradıcılığa və xeyirxahlığa çevirirlər. İlahiyyatçı yazıçı, araşdırmaçı jurnalist, I qrup Qarabağ müharibəsi əlili, 26 kitab müəllifi, Həkəri qəzetinin şöbə müdiri Hacı Həsən Hüseyninin ömür yolu da belə nümunələrdəndir.
Hacı Həsən Hüseyni Qarabağ müharibəsinin ilk illərində Azərbaycanın ərazi bütövlüyünün müdafiəsi uğrunda gedən döyüşlərdə iştirak edib, igidlik göstərib. Zəngilan istiqamətində gedən döyüşlərin birində ağır yaralanaraq yeddi il yataq xəstəsi olub. Lakin bu ağır sınaq onu ruhdan salmayıb.
Quranı mütaliə etməklə ərəb dilini öyrənən Hacı Həsən Hüseyni sonralar dini mövzuda dəyərli əsərlər yazmağa başlayıb. Onun yaradıcılığında insanları doğruluğa, mənəvi saflığa, mərhəmətə, xeyirxahlığa və Vətən sevgisinə çağırış mühüm yer tutur.

Hacı Həsən Hüseyninin “Xətai-535” adlı mənbələrə söykənən monoqrafiyası və üçcildlik “Vətəni sevmək imandandır” kitabları onun yaradıcılığının diqqətəlayiq nümunələrindəndir. Bu əsərlərin tərtibçisi və redaktoru olmaq mənim üçün də məsuliyyətli və şərəfli iş olub.
Onun müəllif kimi fəaliyyətini yalnız yazdığı kitablarla məhdudlaşdırmaq olmaz. Hacı Həsən Hüseyni həm də xeyirxah, qayğıkeş və insanlara əl tutmağı özünə mənəvi borc bilən ziyalıdır. Əlillik pensiyasını kitabların hazırlanmasına və nəşrinə sərf etməsi onun elmə, kitaba və mənəvi dəyərlərə bağlılığının göstəricisidir.
Türkiyədə keçirilən beynəlxalq konfransda dini mövzuda etdiyi çıxışların böyük maraq doğurması da onun geniş dünyagörüşünün və elmi-mənəvi axtarışlarının göstəricisidir.
Mən də Hacı Həsən Hüseyninin “Xətai-535” monoqrafiyasını, üçcildlik “Vətəni sevmək imandandır” kitablarını, tərtibçisi və redaktoru olduğum atam İlyas Allahverdiyevin üçcildlik “Yolda qalan izlər” kitabını, eləcə də Həkəri qəzetinin növbəti saylarını Səhiyyə Nazirliyinin Elmi-Tibbi Tədqiqat İnstitutunun kitabxanasına hədiyyə etdim.

İnanıram ki, kitabxanaya bağışlanan hər bir kitab gələcək nəsillərə ünvanlanan mənəvi mirasdır. Bu əsərlərin kitabxana rəflərində yer alması müəlliflərinin düşüncələrinin, həyat təcrübələrinin və xalqa xidmət amallarının yaşadılması deməkdir.
Qazilər şəhidlərimizin canlı əmanətləridir. Belə əmanəti qorumaq, onun əməyinə və yaradıcılığına dəyər vermək hər birimizin mənəvi borcudur. Xüsusilə müharibənin ağır sınaqlarından keçmiş, bütün məhrumiyyətlərə baxmayaraq elmə və yaradıcılığa sarılmış belə insanlara daha çox diqqət göstərilməlidir.
Hacı Həsən Hüseyninin həyat yolu bir daha sübut edir ki, insanın fiziki məhdudiyyətləri onun mənəvi gücünü məhdudlaşdıra bilməz. O, ağır yaralanmasına, uzun illər yataq xəstəsi olmasına baxmayaraq, iradəsini itirməyib, öyrənib, araşdırıb, yazıb və bu gün də insanlara faydalı olmağa çalışır.
Hacı Həsən Hüseyniyə möhkəm cansağlığı, uzun ömür, yeni yaradıcılıq uğurları və xalqımıza xidmət yolunda daha böyük nailiyyətlər arzulayıram.

Rauf İLYASOĞLU
şair-publisist, jurnalist