Serbiya prezidenti Aleksandar Vuçiç səlahiyyət müddətinin vaxtından əvvəl başa çatması və 2026-cı ilin sonunda ölkədə parlament və prezident seçkilərinin eyni vaxtda keçirilməsinin mümkünlüyünü bildirib.

"Turaztv.az" "Unikal"-a istinadən xəbər verir ki, bu barədə o, "Pink" telekanalında danışıb.


"Mənim mandatımda rəsmi olaraq daha bir il yarım qalıb, lakin bu, çox güman ki, daha qısa müddətdə bitəcək" , - deyə Vuçiç bildirib.

Onun sözlərinə görə, ölkə rəhbərliyi prezident və parlament seçkilərinin eyni vaxtda keçirilməsini nəzərdən keçirir.

"Biz çox güman ki, prezident və parlament seçkilərini eyni vaxtda keçirəcəyik. Mən bunun 2026-cı ilin dekabrında, bəlkə də bir qədər tez olacağını gözləyirəm", - deyə o qeyd edib.

Vuçiç vurğulayıb ki, o, yeni prezidentliyə namizədliyi təmin etmək üçün konstitusiyaya düzəlişlər etməyi planlaşdırmır:

"Biz Konstitusiyanı dəyişdirmək istəmirik və mən yenidən prezidentliyə namizədliyimi irəli sürmək niyyətində deyiləm".