Azərbaycan boksçusu Sübhan Mamedov Avropa çempionu olub.

Azərbaycan Boks Federasiyasından "Unikal"a verilən məlumata görə, 50 kiloqram çəki dərəcəsində mübarizə aparan millinin üzvü bu titula Bolqarıstanın paytaxtı Sofiyada yiyələnib.

Dünya çempionu və U-23 Avropa çempionatının qalibi finalda Bair Batlayevi (Rusiya) məğlub edib. Hər 3 raundu xeyrinə bitirən Sübhan Mamedov yekunda 4:1 (30:27, 29:28, 28:29, 30:27, 29:28) hesabı ilə qalib gələrək Avropa çempionatının qızıl medalını qazanıb və Sofiyada Azərbaycan Himnini səsləndirib.

Ondan öncə Səidcəmşid Cəfərov (75 kiloqram) da adını finala yazdırıb. Dünya çempionatının mükafatçısı yarımfinalda Kalum Meykin (İngiltərə) üzərində qələbə qazanıb – 4:1 (28:29, 30:27, 30:27, 29:28, 29:28). Cəfərov sabah həlledici döyüşdə İsmayıl Mutsolqovla (Rusiya) gücünü yoxlayacaq.

Amin Məmmədzadə (55 kiloqram) isə Avropa çempionatını bürünc medalla başa vurub.

Qeyd edək ki, bir gün öncə Məhəmməd Abdullayev (+90 kiloqram) də yarışı bürünc mükafatla bitirib. Sentyabrın 25-də - çempionatın son günündə Cəfərovla yanaşı, Nəbi İsgəndərov (70 kiloqram) da final döyüşünə çıxacaq.