Həyatın sərt üzü - FOTO

Xəbərlər

17.12.2023, 23:10

Həyatın sərt üzü - FOTO

Həyatın sərt üzü

Dəyərsiz adamdan dəyər gözləmə,
Dəyəri özün ver özünə, oğlum!
Söz ki var deyildi, o sənin deyil,
Deyərkən, düşün de sözünü,oğlum!

Çalış tərifini bir az azalt,kəs,
O dəyər sahibi deyilsə bir kəs,
Nöqsansız deyil a,dünyada heç kəs,
Əsil-nəcabətə fikir ver, oğlum!

"Desəm öldürərlər,deməsəm ölləm"!
Atalar sözündə vardır fəzilət.
Amma, öz dərdini səninlə bölən
yoxdusa yanında, sözə nə hacət?

"Anlamaq dərdi"dir bizim dərdimiz,
Ruhuna min rəhmət, ay Mirzə Çəlil!
Anlaşa bilmirik,külli xəstəyiz,
Yarımız yarımcan,yarımız əlil!

Kamil bir adama əl tuta bilsən,
Dəyərli öz yerin tapacaq, oğul!
Nadana köməkcün əl yetirməsən,
Onsuz da karlı yer "yapacaq", oğul!

Zatıqırıqlarda mürvət arama,
Zatını danandır, şeytanı anan.
Nanəcib qadında ismət qurama,
Taxtalı tumandır,baftası yalan.

Həyat verib mənə elə bir dərs ki,
Dəmir tək döyülüb,odda yanmışam!
Dəyibdi taleyin şilləsi tərs ki,
Özümü unudub səni anmışam!

Pərişan günündə üzülməyən kəs,
Sənin şad günündə sevinə bilməz!
Sənin uğuruna sevinməyən kəs,
Vallah ki,ay oğul,qəpiyə dəyməz!

Dəyərsiz adamdan dəyər gözləmə,
Dəyəri özün ver özünə, oğlum!
Söz ki var deyildi o sənin deyil,
Deyərkən düşün de sözünü, oğlum!

Cümşüd Aydəmir,
Xudat-Bakı-Xudat 15-16.12.23